A Xunta licita por máis de 811.000 € a explotación das estacións de autobuses de Monforte de Lemos, Sarria e O Barco de Valdeorras

As empresas interesadas neste contrato poderán presentar as súas ofertas ata o vindeiro 8 de setembro

O concesionario prestará os servizos aos usuarios e aos transportistas, como é a asistencia na facturación, consigna e venda de billetes

A Xunta levou a cabo recentemente actuacións de mellora nestas estacións, para proporcionarlles aos usuarios unhas instalacións máis cómodas e eficientes

Santiago de Compostela, 7 de agosto de 2021

A Consellería de Infraestruturas e Mobilidade licitou a concesión de servizos para a xestión da explotación das estacións de autobuses de Monforte de Lemos, de Sarria e do Barco de Valdeorras, por un valor estimado de máis de 811.000 euros (sen IVE).

A Plataforma Contratos Públicos de Galicia vén de publicar a licitación deste contrato, ao que as empresas poderán presentar as súas ofertas ata o vindeiro 8 de setembro.

Unha vez finalizados os contratos de concesión de servizos para a xestión da explotación do servizo público destas tres estacións de autobuses, cómpre licitar un novo contrato de explotación, que terá un prazo de 5 anos.

Estas estacións de autobuses contan con plataformas cubertas para a subida e baixada dos usuarios e zona de espera independente.

O concesionario do servizo de explotación prestará ou facilitará os servizos preparatorios e complementarios do transporte a usuarios e transportistas e proporcionará os servizos de facturación, consigna, venda de billetes e información ao viaxeiro.

O adxudicatario do contrato tamén deberá cumprir coas tarefas de conservación e mantemento das instalacións.

Actuacións de mellora

Cómpre lembrar que a Xunta, previamente á licitación dos novos contratos de xestión da explotación destas estacións, realizou actuacións de mellora en varias destas terminais.

As actuacións realizadas foron executadas durante os anos 2019 e 2021 no marco das obras de renovación e mellora de cinco estacións de autobuses da provincia de Lugo, nas que se incluíron, ademais da de Burela, a de Ribadeo e a de Viveiro, as terminais de Monforte de Lemos e de Sarria. O investimento autonómico conxunto nestas intervencións acadou os 732.000 euros.

As obras tiñan por obxectivo proporcionarlles aos usuarios do transporte público en autobús unhas instalacións máis cómodas e eficientes e con máis información sobre horarios, servizos e liñas dispoñibles.

As intervencións incluíron reparacións puntuais e melloras nas cubertas das terminais de autobuses, coa renovación de pavimentos, principalmente nas zonas máis deterioradas, como é o caso da zona de circulación de autobuses.

Tamén se incluíron melloras nas instalacións eléctricas e na iluminación, o arranxo de falsos teitos ou dos aseos e a dotación de equipamento, como pantallas de información ou novo mobiliario para facer máis cómoda a espera de viaxeiros.

Imaxes relacionadas