A Xunta adxudica por preto de 2 M€ as obras de mellora do firme en 2 estradas autonómicas do sur da provincia de Lugo
A actuación, que comezará na segunda quincena de agosto, desenvolverase en 22 km da vía de altas prestacións CG-2.1, entre Monforte e o Alto do Faro, e da LU-533, entre Chantada e Escairón
Os traballos de acondicionamento da capa de rodadura completaranse coa limpeza e roce das cunetas e coa reposición da sinalización horizontal, marcas viarias e captafaros
A Xunta segue a destinar recursos técnicos e económicos para proporcionarlles aos cidadáns unha rede viaria autonómica máis cómoda e segura
A Xunta adxudica por preto de 2 millóns de euros as obras de mellora do firme de dúas estradas autonómicas do sur da provincia de Lugo.
Os traballos, adxudicados á empresa OVISA Pavimentos y Obras, comezarán na segunda quincena de agosto e terán un prazo de execución de 6 meses.
Trátase das actuacións de reforzo do firme ao longo de 22 quilómetros da vía de altas prestacións CG-2.1, que une Monforte de Lemos co Alto do Faro, e da LU-533, a estrada autonómica que comunica Chantada e Escairón.
As actuacións proxectadas permitirán a mellora do firme nestas dúas estradas, ao seu paso polos municipios de Monforte de Lemos, de Pantón, do Saviñao e de Chantada.
Máis en detalle, intervirase en case 12 km da vía de altas prestacións de conexión con Chantada, que continúa cara a Lalín, concretamente no treito entre Monforte e Escairón; e en algo máis de 10 km da estrada autonómica LU-533.
Segundo o grado de deterioro que presente o firme, realizaranse fresados de maior ou menor espesor, para garantir unha correcta execución dos traballos, incrementando a durabilidade e a adherencia; reforzando a seguridade e ofrecendo tamén maior comodidade de condución aos usuarios destas dúas estradas da Xunta. No caso da vía de altas prestacións, na CG-2.1, estenderase unha capa de rodadura en toda a lonxitude da estrada.
Estes traballos completaranse coa limpeza e roce das cunetas e coa reposición da sinalización horizontal, marcas viarias e captafaros.
Estas actuacións forman parte do Plan de reforzo de firmes, mediante o cal a Xunta investirá este ano 4,6 M€ no acondicionamento do firme das estradas autonómicas da provincia de Lugo. As actuacións previstas están xa todas elas licitadas e o obxectivo é executalas ao longo do presente exercicio 2021.
A Xunta segue a destinar recursos técnicos e económicos para que as estradas autonómicas se atopen nas mellores condicións, co obxectivo de proporcionarlle aos cidadáns vías máis cómodas e seguras para os seus desprazamentos.