A Xunta pide que o Goberno central inclúa orzamento para o novo modelo de coidados dentro das transferencias dos fondos para dependencia

O director xeral de Atención Integral Sociosanitaria, Antón Acevedo, pediu que o Goberno central inclúa orzamento específico para o novo modelo de coidados dentro das transferencias dos fondos para dependencia. Esta mañá participou na reunión do Consello Territorial dos Servizos Sociais na que se trataron varios temas referidos a esta área.

O director xeral lembrou que Galicia leva meses traballando na redifinición deste modelo e agradece que o Executivo central participe tamén desta mellora. Neste sentido, sinalou que para achegar solucións é imprescindible que poña orzamentos concretos á disposición das comunidades autónomas dentro dos fondos contemplados para dependencia no ano 2022.

Por outro lado, Antón Acevedo apuntou que durante este encontro abordouse a posible reforma que propón o Goberno central do Real Decreto para o recoñecemento do grao de discapacidade. Unha reforma que cualificou como positiva, ao permitir reducir os tempos de valoración da discapacidade e simplificar o procedemento.

Desde o Goberno galego propúxose a creación dunha pasarela para que os grandes dependentes poidan obter o grao de discapacidade coa máxima facilidade e co mínimo papelame. Así mesmo, o director xeral tamén aproveitou para lembrar que as Comunidades aínda non recibiron nada dos fondos europeos nin do anunciado incremento dos fondos de dependencia, polo que pediu celeridade no proceso.