A Consellería de Política Social desenvolve dous minicampamentos en Covelo para impulsar o ocio educativo e a conciliación

A Consellería de Política Social, a través da Dirección Xeral de Xuventude, está a desenvolver dous minicampamentos no Concello de Covelo, enmarcados no programa Coñece Galicia da campaña O Verán Que Mereces 2021, cos que pretende impulsar o ocio educativo e a conciliación familiar.

O delegado territorial da Xunta en Pontevedra, Luis López, acompañado do alcalde de Covelo, Pablo Castillo, e da xefa territorial de Política Social, María José Pérez Izaguirre, visitou esta mañá a primeira quenda do minicampamento Aventura en Paradanta e departiu cos monitores e coa vintena de rapaces participantes, con idades comprendidas entre os 10 e os 14 anos.

"A Xunta de Galicia, dentro das moitas modalidades de campamentos, formación estival e accións de conciliación e axuda ás familias, está a impulsar por segundo ano consecutivo este formato de minicampamentos, que consiste en estadías curtas, de cinco días, e que está a ser moi éxitoso, xa que esgotou rapidamente as súas 600 prazas", especificou o representante autonómico.

Luis López engadiu que o obxectivo desta novidosa modalidade "céntrase en amosar aos cativos a riqueza patrimonial e natural de Galicia, o coidado do medio ambiente e impulsar o ocio educativo, polo que para unha acción destas características o municipio de Covelo é un dos enclaves máis idóneos".

Deste xeito, ao longo desta semana estase a desenvolver a primeira quenda de Aventura en Paradanta, que terá a súa continuidade entre os días 19 e 23 de xullo con outros vinte rapaces participantes.

Todos eles estanse a aloxar no lugar das Devas e desenvolven, durante os cinco días do minicampamento, actividades como excursións a Monçao e Farum, xogos de pistas, roteiros de interpretación, láser tag, slackline, tiro con arco, kaiak, rafting polo río Miño ou xogos na praia fluvial de Maceira, entre outras.

En total, a Consellería de Política Social habilitou este verán 30 quendas, con vinte participantes cada unha, deste formato de minicampamentos entre os meses de xullo e agosto e distribuíunas entre trece localizacións da comunidade galega. Ademais, a campaña O Verán Que Mereces 2021 alcanza, incluíndo todas as modalidades de campamentos e campos de voluntariado, un total de 7.800 prazas a disposición da mocidade e desprégase cun protocolo sanitario fronte á covid-19 para outorgar a maior seguridade sanitaria aos cativos.