A Xunta apoia a actividade do sector da transformación de produtos do mar con máis de 26 millóns de euros

A conselleira do Mar, Rosa Quintana, puxo hoxe en valor o potencial da industria galega de transformación de produtos do mar e o seu importante papel durante os momentos máis difíciles da pandemia nos que respondeu con esforzo e compromiso para manter o seu nivel de actividade e seguir ofrecendo alimentos de calidade á cidadanía. Un labor, subliñou a conselleira, do que o Executivo galego é consciente e que compensa cos apoios destinados a este sector que nas convocatorias de axudas deste ano se traducen en máis de 26 millóns de euros.
Así o sinalou durante a presentación da X Conferencia Mundial do Atún que se celebrará o 13 e 14 de setembro tanto en modalidade presencial en Vigo como de xeito virtual e que organiza a patronal conserveira Anfaco-Cecopesca . Alí tamén explicou que dos máis de 26 millóns de euros de achegas cofinanciadas co Fondo Europeo Marítimo e da Pesca (FEMP), máis de 22,4 millóns de euros se corresponden coa convocatoria deste ano de axudas para melloras nas pequenas e medianas empresas de transformación dos produtos do mar.

A esta convocatoria a Xunta destinara un crédito inicial de 16 millóns de euros e en próximos días o Diario Oficial de Galicia publicará o incremento de crédito en máis de 6,4 millóns de euros para poder atender todas as solicitudes presentadas que cumpren os requisitos, explicou Rosa Quintana.

Outros 4 millóns de euros correspóndense cos apoios que forman parte do plan Avantemar para compensar a caída de ingresos nas empresas de transformación de peixes e mariscos entre o 1 de febreiro e o 31 de decembro de 2020 como consecuencia do coronavirus. Para estas achegas está aberto o prazo de presentación de solicitudes ata o 28 de xullo e con elas a Xunta subvencionará ata o 50% das perdas de facturación rexistradas sempre e cando estas sexan de polo menos un 20% en relación cos ingresos medios para o mesmo período nos tres anos anteriores -2017, 2018 e 2019-. No caso de empresas con menos de tres anos estas deberán ter actividade durante polo menos o ano natural 2019 completo e o cálculo realizarase tendo en conta os datos dos anos correspondentes.

Con este tipo de apoios, especificou a titular de Mar, a Xunta busca seguir impulsando o potencial e a vocación innovadora do sector transformador como o das conservas de produtos do mar. Unha industria, subliñou, que soubo adaptarse ás necesidades xurdidas na sociedade durante a pandemia da covid-19 e aproveitar a situación para facer oportunidade da dificultade intensificando a busca de novos nichos de negocio e potenciando as vendas en liña, entre outros aspectos.

Conferencia Mundial do Atún

En relación á Conferencia Mundial do Atún, Rosa Quintana salientou o valor desta plataforma que sitúa a Galicia, e a Vigo en particular, como epicentro do sector internacional do atún pois reunirá ás empresas máis relevantes neste eido e radicadas en diferentes países de Europa, América, Oriente Medio, África e Asia. Ademais sinalou que este evento funciona como escaparate do saber facer de Galicia neste ámbito e como foro de debate sobre os últimos desenvolvementos do sector atuneiro a nivel global.

Isto converte a esta conferencia, engadiu a titular de Mar, nunha grande oportunidade para defender ante o mundo os intereses da industria galega que teñen a súa base en que toda as empresas compitan en igualdade de condicións e cos mesmos estándares en aspectos como a trazabilidade, a hixiene e as condicións laborais.

Por último, Rosa Quintana tasladou o agradecemento do Goberno galego a Anfaco-Cecopesca polos seus esforzos para adaptar este evento ás circunstancias e por seguir facéndoo posible. Tamén agradeceu a colaboración dos patrocinadores e entidades do sector que axudan a que esta conferencia siga sendo unha realidade.