A Axencia Galega de Infraestruturas e o Instituto de Estudos do Territorio colaboran na implantación dun sistema dixital para a xestión das estradas da Xunta

A Consellería de Infraestruturas e Mobilidade, a través da Axencia Galega de Infraestruturas, e a Consellería de Medio Ambiente, Territorio e Vivenda, a través do Instituto de Estudos do Territorio, colaborarán na implantación un sistema dixital para optimizar a xestión da rede de estradas de titularidade da Xunta.
A conselleira de Infraestruturas e Mobilidade, Ethel Vázquez, e a titular de Medio Ambiente, Territorio e Vivenda, Ángeles Vázquez, asinaron un acordo de colaboración para levar a cabo as actuacións necesarias.
O obxectivo é desenvolver un visor xeográfico corporativo coa información da rede de estradas autonómicas que se atope dispoñible en cada momento, partindo da situación actual e avanzando segundo se vaian realizando os traballos de dixitalización e estruturación de datos das vías.
Trátase de dispoñer dunha ferramenta unificada, que aglutine toda a información xeográfica das estradas autonómicas, representando tamén un instrumento de traballo útil para o persoal da Axencia Galega de Infraestruturas.
Ademais este mecanismo suporá un punto de consulta de información para o conxunto da cidadanía, que poderá simplificar os seus trámites co organismo xestor das estradas de titularidade da Xunta de Galicia.

Compromisos

En canto aos compromisos recollidos no convenio, a Axencia Galega de Infraestruturas asume as tarefas de planificar, organizar e impulsar os traballos e estudos obxecto deste acordo, así como facilitar a información para desenvolver o visor.
A Axencia Galega de Infraestruturas tamén colaborará na notificación dos erros existentes na cartografía base oficial da Xunta con respecto á rede de estradas e trasladará ao Instituto de Estudos do Territorio a información xeográfica actualizada con periodicidade anual das accións realizadas que poidan repercutir nas vías.
O Instituto de Estudos do Territorio asumirá os compromisos de asesoramento e apoio aos traballos de análise e planificación no eido da información xeográfica correspondentes a infraestrutura viaria.
Tamén coordinará a información necesaria para a planificación así como a difusión dos datos mediante un visor xeográfico.

Dixitalización e innovación na xestión integral das estradas autonómicas

A Xunta está a impulsar a dixitalización e a innovación na xestión integral das estradas autonómicas. A finais de xuño licitou dous contratos para avanzar na Estratexia de Dixitalización e Innovación en materia de estradas de Galicia, cun investimento de preto de 1,8 millóns de euros.
O obxectivo é poñer á disposición dos cidadáns unha gran cantidade de información, mellorando a transparencia, optimizando os recursos da administración e aforrando custos e tempo nas tramitacións administrativas.
Para iso integraranse todos os datos e sistemas informáticos da Axencia Galega de Infraestruturas, o que permitirá poñer á disposición dos cidadáns información estruturada, mellorando os tempos de xestión ás persoas e optimizando os recursos da administración.