Emigración abre un novo portal en Galiciaaberta con información tributaria para residentes no exterior
O novo enlace permitirá coñecer aos residentes en 11 países de Europa e retornados a Galicia cuestións relativas as rendas, aos estados de tributación, as pensións así como aos impostos de sucesións, de rendas de non residentes e de patrimonio e bens no estranxeiro
Proximamente ampliarase con información relativa aos países americanos con maior número de residentes galegos
Esta nova iniciativa ten carácter meramente informativo
Santiago de Compostela, 02 de xullo de 2021.- O secretario xeral da Emigración, Antonio Rodríguez Miranda, presentou onte a través de Facebook Live o novo portal que este departamento autonómico acaba de poñer en funcionamento hoxe na súa web Galiciaaberta e no que os residentes no exterior e retornados poden consultar información tributaria relativa aos seus países de residencia en relación con España.
En total, pódese consultar esta información nos 11 países con maior número de residentes de orixe galego en Europa, e posteriormente, ampliarase cos países con maior colectividade galega en América.
A Secretaría Xeral da Emigración ofrece, a través deste portal, unha serie de informacións básicas para aclarar, nunha primeira aproximación, as cuestións básicas vinculadas á tributación das rendas obtidas por persoas físicas que teñan a condición de galegos/as retornados/as ou de galegos/as no exterior.
Ademais, tamén, a través dos seguintes enlaces orientarase de xeito sinxelo e visual sobre as regras xerais existentes en relación aos principais criterios previstos para cada tipo de renda segundo os países, centrándoos nas persoas físicas.
Este departamento autonómico actúa cun papel meramente informativo co fin de que os/as galegos do exterior e os retornados poidan cumprir coas medidas tributarias do país no que residen e tamén coas de España. Para máis información será necesario dirixirse á Axencia Tributaria do Estado e ás/aos seus técnicos competentes.
Máis información no seguinte enlace: https://emigracion.xunta.gal/es/informacion-tributaria-para-residentes-no-exterior
Imaxes relacionadas
