O 061 de Galicia aconsello extremar as precaucións nos desprazamentos por estrada no inicio da Operación Saída

A Fundación Pública Urxencias Sanitarias de Galicia-061, servizo que coordina e xestiona as urxencias e emerxencias sanitarias na Comunidade galega, reitera, un ano máis, o seu chamamento á precaución nos desprazamentos polas estradas ante o comezo mañá, 2 de xullo, da Operación Saída, na que se estima un aumento da afluencia de vehículos por coincidir o comezo do mes de xullo co inicio da fin de semana.

Aínda que a Comunidade galega, con 70 falecidos en accidentes de tráfico no ano 2020, rexistrou o ano pasado a cifra máis baixa de decesos por sinistros nas estradas desde que se contabilizan estes datos, relaciónase este descenso coas restricións de mobilidade decretadas por mor da pandemia da Covid-19.

Así, cómpre salientar a importancia de extremar as precaucións nos desprazamentos por estradas, xa que os accidentes de tráfico non só provocan falecementos, senón que en moitos casos provocan múltiples lesións que supoñen graves secuelas nas persoas que as sofren. Por iso, desde o servizo público galego de atención ás urxencias e emerxencias extrahospitalarias aconséllase ter en conta as seguintes medidas, no caso de que vostede vaia a utilizar un vehículo para desprazarse nestas datas nas que o volume de tráfico é maior.

Normas de prevención

Evite as comidas copiosas e non consuma alcohol, se vostede vai conducir, e lembre que os efectos das bebidas alcohólicas non só incrementan o risco de sufrir accidentes, senón que no caso de ter un sinistro dificultan as tarefas dos servizos sanitarios ao interferir cos fármacos subministrados.

Respecte as normas de tráfico en todo momento e teña en conta que a velocidade é outro dos factores que intervén nun accidente. A maior velocidade aumentan as probabilidades de sufrir ou provocar un sinistro, e a gravidade das lesións producidas neste.

Os peóns deben facerse ver, se circulan ou cruzan por estradas, co uso obrigatorio de prendas reflectantes que lles fagan visibles. No caso de accidentes de tráfico, o uso dun chaleco reflector de alta visibilidade é obrigatorio cando se salga do vehículo e se ocupe a calzada ou a beiravía das vías interurbanas.

Por último, lembre a conveniencia de empregar os sistemas de seguridade activa como os cintos, o casco ou as cadeiras infantís. A ausencia destes elementos fai que as lesións sexan moito máis graves en caso de accidente.

Cómpre subliñar que o 061 é un servizo que funciona as 24 horas, os 365 días do ano. As súas chamadas serán atendidas por profesionais sanitarios que valorarán a situación e no caso de necesitalo, mobilizarán os recursos que se desprazarán ata o punto, mentres vostede recibe as indicacións sobre como actuar ata que chegue o recurso máis axeitado. Lembre que moitas vidas se poden salvar e moitas lesións se poden atenuar se son tratadas do modo axeitado.