A Xunta suma os negocios MYS Ópticos de Santiago, Moda Infantil Parruliños de Cambados e Sneakersnº2 de Ourense os establecementos con descontos para a Tarxeta Benvida
Ofrecerán entre un 3% e un 5% de rebaixa aos beneficiarios desta axuda da Consellería de Política Social
Ademais daqueles sectores como farmacias e supermercados, entre outros, nos se pode facer uso da tarxeta, hai unha decena de establecementos en Galicia nos que se aplican estas vantaxes engadidas
A Xunta de Galicia continúa a incrementar a oferta de establecementos adheridos á Tarxeta Benvida. MYS Ópticos, en Santiago; Moda Infantil Parruliños, en Cambados; e Sneakersnº2, en Ourense, acaban de asinar convenios de colaboración coa Consellería de Política Social para adherirse ao programa e ofrecer descontos especiais a todos os beneficiarios desta axuda autonómica.
Deste xeito, ademais de poder facer uso da tarxeta para pagar nos negocios, achegarán un desconto para os seus usuarios. No caso de MYS Ópticos e Moda Infantil Parruliños, ofreceranse rebaixas dun 5%, mentres que en Sneakersnº2 os descontos serán dun 3%.
Agora son máis dunha decena de establecementos galegos os que ofertan vantaxes aos perceptores desta axuda autonómica. Ademais destes descontos, a Tarxeta Benvida permite aos seus beneficiarios comprar produtos de hixiene, téxtil, farmacia, parafarmacia tendas de alimentación, librarías, ópticas e establecementos de puericultura ou especializados en artigos e produtos para a infancia.
Sumarse ao programa
Todo aquel negocio que estea interesado en formar parte desta iniciativa pode encontrar a solicitude de adhesión na páxina web da Consellería de Política Social. Deben engadir todos os datos de interese que require o documento para logo trasladalo á Dirección xeral de Familia, Infancia e Dinamización demográfica a través da Sede Electrónica da Xunta (procedemento PR00A).
Imaxes relacionadas
