A Xunta publica hoxe no Diario Oficial de Galicia o cambio de titularidade a prol do concello de Valga da estrada autonómica PO-190 en Ferreirós
Transfírense un treito de 730 metros de modo previo á licitación da 2ª fase de urbanización desta vía, que financiará a Administración autonómica cun investimento de máis de 530.000 euros
Daráselle continuidade aos traballos executados recentemente nos primeiros 470 metros da travesía, cun investimento da Xunta de case 370.000€
Actuarase no seguinte treito, reconstruíndo as beirarrúas, mellorando a accesibilidade e eliminando as barreiras arquitectónicas
Con esta transferencia o Concello asume a xestión e conservación deste tramo
A Xunta publica hoxe no Diario Oficial de Galicia (DOG) a transferencia a prol do Concello de Valga da estrada autonómica PO-190, no tramo comprendido entre os puntos quilométricos 0+550 e 1+280, en Ferreirós.
No seguinte enlace ao DOG pódese ampliar a información relativa a esta transferencia, aprobada na reunión do Consello da Xunta do pasado día 10 de xuño: https://xurl.es/rajzi
A Consellería de Infraestruturas e Mobilidade e o Concello de Valga asinaron en abril deste ano un convenio de colaboración polo que a Administración autonómica se comprometía a asumir o financiamento para completar as obras de mellora da estrada autonómica, cun investimento autonómico de máis de 530.000 euros.
Esta actuación dálle continuidade aos traballos de urbanización da travesía da PO-190, executados nunha primeira fase no ano 2020, entre os puntos quilométricos 0 e 0+470, cun investimento da Xunta que roldou os 370.000 euros.
O Concello comprometeuse á adxudicación e á execución das obras, realizando a Xunta o cambio de titularidade de modo previo á súa licitación por parte da Administración local.
A estrada obxecto de transferencia é un resto da antiga PO-548, que une Pontecesures e remata na glorieta do porto de Vilagarcía, posúe un tráfico rodado de ámbito local e carece de funcionalidade dentro da rede autonómica de estradas de Galicia.
Segundo a Lei 8/2013 de estradas de Galicia, os cambios de titularidade das estradas ou treitos delas, cando non se trate de travesías urbanas ou treitos que estean incluídos no inventario da súa administración titular, deberán ser aprobados por decreto da Xunta, por proposta da consellería competente en materia de estradas.
O cambio de titularidade será efectivo desde mañá. A partir da entrega, correspóndenlle ao Concello de Valga todas as actividades de xestión, mantemento, conservación e explotación da vía, así como o exercicio das funcións de disciplina viaria.
As obras proxectadas
Segundo o convenio de colaboración asinado, correspóndelle ao Concello de Valga executar os traballos necesarios para completar a urbanización da travesía, entre os puntos quilométricos 0+470 e 1+290.
Nesta segunda fase as obras céntranse no arranxo e demolición das beirarrúas e na súa reconstrución coas mesmas características que o tramo xa renovado, seguindo a liña de promoción de mellora da accesibilidade e supresión de barreiras arquitectónicas nas que vén traballando a Xunta.
Nesta actuación incluirase, tamén, a renovación dos servizos municipais da rede de augas pluviais, de abastecemento e de alumeado. Ademais, procederase ao soterramento da rede eléctrica e tramos da rede telefónica.
Ademais executaranse varios muros, tanto de sostemento de estrada como de contención de terras, e renovarase na súa totalidade o pavimento da calzada, así como a sinalización horizontal e vertical.
O departamento que dirixe Ethel Vázquez segue a fomentar investimentos que melloren as infraestruturas viarias, coa finalidade de favorecer o desenvolvemento económico e social e achegar unha maior calidade de vida á cidadanía.