A Xunta exixe a retirada do recurso contra a reforma da Lei de saúde de Galicia tras non recorrer o Goberno o mesmo texto en Baleares

O conselleiro de Sanidade, Julio García Comesaña, lamentou, esta tarde no Parlamento de Galicia, a dobre vara de medir empregada polo Goberno central á hora de aceptar as modificacións propostas polas comunidades autónomas, de cara a modificar os textos das súas leis sanitarias, para optimizar a xestión da crise sanitaria.
Durante a súa intervención, o responsable da Sanidade galega reprobou o feito de que o Goberno central considere que “o Parlamento galego ten menos lexitimidade que o Parlamento balear”, en alusión á aprobación das modificacións introducidas polo Goberno das Illas Baleares, cando se trata, exactamente, dos mesmos parágrafos que están incluídos na lei galega.
García Comesaña remarcou que as decisións adoptadas contra a normativa galega responden “exclusivamente a motivos partidistas”, unha circunstancia “inadmisible” que deixa a Galicia sen as ferramentas precisas para xestionar con maiores garantías a pandemia provocada pola covid-19.
Ante este agravio comparativo, o conselleiro de Sanidade anunciou que, esta mesma mañá, o Executivo galego vén de enviar unha carta aos Ministerios de Sanidade e Política Territorial solicitando a retirada do recurso interposto contra a Lei galega, e o levantamento da suspensión dos artigos referidos á xestión da pandemia.
O conselleiro, solicitou tamén un “mínimo de coherencia” ao Goberno central, ao non comprender como para unha Comunidade Autónoma un mesmo texto normativo é válido, mentres que noutras, é susceptible de recurso.