Extinguido o incendio forestal do concello pontevedrés de Salvaterra de Miño, parroquia de Uma
Segundo as últimas medicións, o lume afectou unha superficie de 352 hectáreas
A Consellería do Medio Rural informa de que quedou extinguido ás 22,22 h. desta noite o incendio forestal que se rexistrara no concello pontevedrés de Salvaterra de Miño, parroquia de Uma, e que tamén afectou ás localidades veciñas de Mondariz e Covelo.
O lume iniciárase ás 21,51 h. do sábado e, segundo as últimas medicións, afectou unha superficie de 352 hectáreas. Delas, 282 son arboradas e 70 rasas. Para o seu control mobilizáronse en total 2 técnicos, 16 axentes, 60 brigadas, 37 motobombas, 2 pas e 2 helicópteros.
Cabe lembrar que neste lume foi preciso decretar a Situación 2 pola proximidade do lume ao núcleo de Maceiras, en Salvaterra, e posteriormente aos núcleos de Mouriscados, Fontebalán e Crespos, xa en Mondariz. Grazas ao traballo dos servizos de extinción, a medida preventiva quedou suspendida na mañá do domingo.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.