Fabiola García subliña a implicación do Goberno galego na accesibilidade das persoas xordas a servizos públicos

A conselleira de Política Social, Fabiola García, subliñou a implicación do Goberno galego na accesibilidade das persoas xordas a servizos públicos. A titular do departamento autonómico participou esta mañá na elaboración dun mural coa lingua de signos e braille realizado en San Caetano pola Fundación Abrente a través do programa ENKI co gallo do Día Nacional da Lingua de Signos. Na súa elaboración tamén colaboraron o director xeral de Maiores e Persoas con Discapacidade, Fernando González Abeijón; o presidente da ONCE Galicia, Carlos Fernández Lamigueiro; e o presidente da Federación de Asociacións de Persoas Xordas de Galicia (FAXPG), Iker Sertucha Lista.
A conselleira sinalou que, como toda ferramenta comunicativa, a lingua de signos permite ás persoas xordas acceder a servizos e a prestacións. Neste sentido, destacou que a Xunta traballa nesta maior accesibilidade a través do servizo de intérpretes da Corporación de Radio e Televisión de Galicia (CRTVG) ou coa súa presenza en hospitais públicos galegos.

Fabiola García reivindicou unidade de acción institucional para que todos os poderes públicos sexan máis accesibles e cheguen a máis xente e máis lugares. Unha acción para a que se fai moi necesaria a implicación dos organismos locais e que permitirá seguir avanzando cara esa sociedade máis igualitaria, xusta e accesible.

Agradecemento ás entidades sociais

Así mesmo, a titular de Política Social aproveitou o acto para agradecer ás entidades sociais que traballan neste eido o seu labor diario para asesorar e axudar ás persoas con necesidades especiais, e lembroulles que o Goberno galego estará sempre ao seu carón para impulsar novas medidas e iniciativas.