A Consellería do Medio Rural informa da situación dos lumes forestais con datos recollidos ata as 9,00 h de hoxe
Controlados os incendios rexistrados en Salvaterra de Miño (Uma) e Folgoso do Courel (parroquia homónima) con superficies afectadas de 350 e 160 hectáreas, respectivamente
No lume de Salvaterra de Miño foi preciso activar a Situación 2 pola proximidade do lume ás casas, aínda que a medida xa quedou desactivada na mañá de onte
A Consellería do Medio Rural informa da situación dos lumes forestais con datos recollidos ata as 9,00 h. de hoxe.
Salvaterra de Miño
Controlado ás 00,14 h. desta madrugada o lume rexistrado en Salvaterra de Miño, parroquia de Uma, tras iniciarse ás 21,51 h. do sábado, e afectar tamén ás localidades veciñas de Mondariz e Covelo. Neste lume foi preciso decretar a Situación 2 pola proximidade do lume ao núcleo de Maceiras, en Salvaterra, e posteriormente aos núcleos de Mouriscados, Fontebalán e Crespos, xa en Mondariz. Grazas ao traballo dos servizos de extinción, a medida preventiva quedou suspendida na mañá do domingo.
Segundo novas estimacións, este incendio forestal afecta unha superficie provisional de 350 hectáreas. Para o seu control téñense mobilizado ata o momento 1 técnico, 15 axentes, 55 brigadas, 33 motobombas, 2 pas e 2 helicópteros.
Folgoso do Courel
Tamén quedou controlado ás 1,28 h. desta madrugada o lume rexistrado no concello de Folgoso do Courel, parroquia homónima, tras comezar ás 4,50 h. da madrugada do sábado. Segundo as últimas estimacións provisionais, afecta unha superficie dunhas 160 hectáreas. Ata o de agora desprazáronse á zona para controlalo 1 técnico, 14 axentes, 45 brigadas, 20 motobombas, 1 pa, 9 avións e 2 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.