A Consellería do Medio Rural informa da situación dos lumes forestais con datos recollidos ata as 13,30 h de hoxe
Permanece activo o incendio do municipio pontevedrés de Salvaterra de Miño, parroquia de Uma, que tamén afecta as localidades veciñas de Mondariz e Covelo e que rolda as 200 ha
Neste lume chegou a decretarse a Situación 2 pola proximidade do lume ás casas, aínda que a medida quedou desactivada esta mañá
Tamén segue activo o incendio do concello lucense de Folgoso do Courel, parroquia homónima, que afecta unhas 105 hectáreas
A Consellería do Medio Rural informa da situación dos lumes forestais con datos recollidos ata as 13,30 h de hoxe.
Salvaterra de Miño
Permanece activo, dende que se iniciou ás 21,51 h da pasada noite, o incendio do concello pontevedrés de Salvaterra de Miño, parroquia de Uma, que tamén afecta as localidades veciñas de Mondariz e Covelo. Neste lume chegou a decretarse a Situación 2 ás 00,59 h desta madrugada pola proximidade do lume ao núcleo de Maceiras, en Salvaterra, e posteriormente aos núcleos de Mouriscados, Fontebalán e Crespos, xa en Mondariz. Grazas ao traballo dos servizos de extinción, a medida preventiva quedou suspendida ás 7,26 h. desta mañá.
Segundo as últimas estimacións, este incendio forestal afecta unha superficie provisional de 200 hectáreas. Para o seu control téñense mobilizado ata o momento 12 axentes, 38 brigadas, 23 motobombas, 2 pas e 2 helicópteros.
Folgoso do Courel
Tamén continúa activo, dende que se iniciou ás 04,50 h da madrugada de onte, o incendio rexistrado no municipio lucense de Folgoso do Courel, parroquia homónima. Segundo as últimas estimacións provisionais, afecta unha superficie dunhas 105 hectáreas. Ata o de agora desprazáronse á zona para controlalo 1 técnico, 11 axentes, 32 brigadas, 14 motobombas, 1 pa, 8 avións e 2 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.