Medio Ambiente participa na limpeza da praia de Con Negro dentro da campaña ‘1m2 contra a basuraleza’

A directora xeral de Calidade Ambiental, Sostibilidade e Cambio Climático, Sagrario Pérez, participou esta mañá na praia de Con Negro nunha das 63 accións de limpeza de residuos programadas para hoxe por toda a Comunidade no marco da iniciativa 1m2 contra a basuraleza, impulsada por SEO/BirdLife e Ecoembes, co apoio da Xunta de Galicia, para loitar contra a presenza de lixo na natureza e sensibilizar á cidadanía sobre este problema medioambiental.

Concretamente, os participantes nesta batida, organizada polo Concello do Grove, estiveron durante dúas horas recollendo e clasificando o lixo que atoparon no areal e nas súas inmediacións, un traballo que se completará coa posterior caracterización destes residuos a través da App Basuraleza co fin de estudar o seu impacto no medio e sacar as oportunas conclusións.

Nesta quinta edición da campaña, son máis de mil as actuacións colaborativas programadas por todo o país. A Xunta sumouse en 2017 por primeira vez á iniciativa e un ano máis, volve apoiar todas as accións de limpeza en espazos naturais que se levarán a cabo ao longo do día en Galicia —16 na provincia da Coruña, 9 na de Lugo, 6 en Ourense e 32 en Pontevedra— e que mobilizarán a máis de 600 voluntarios contra a “basuraleza” en espazos naturais de gran valor.