A Xunta concede 96.000 euros ao Concello de Pontedeva para executar melloras nos accesos ao polígono industrial de Trado
O vicepresidente económico e conselleiro de Economía, Empresa e Innovación, Francisco Conde, informou desta nova achega ao alcalde en funcións, Juan Carlos González
Pontedeva, ao ser Concello Emprendedor, tivo prioridade no reparto desta orde de axudas
A Xunta de Galicia, a través da Vicepresidencia segunda e Consellería de Economía, Empresa e Innovación, vén de concederlle ao Concello de Pontedeva unha axuda por importe de 96.000 euros para a mellora dos accesos ao polígono industrial de Trado e dotalo así de servizos que o fagan gañan en competitividade.
O vicepresidente económico, Francisco Conde, informou ao alcalde en funcións deste concello ourensán, Juan Carlos González, da aprobación deste apoio, que se destinará a actuacións sobre o pavimento, a rede de abastecemento e as beirarrúas do parque empresarial. Esta iniciativa mobilizará 120.000 euros, dos que o 80% corresponden á axuda aprobada pola Administración galega.
De feito, esta axuda vai na liña dos apoios concedidos a este concello, con iniciativas levadas a cabo pola Administración local, empresas e particulares. En concreto, nos últimos 12 anos esta Consellería outorgoulle a Pontedeva preto de 600.000 euros, o que permitiu mobilizar 800.000.
Conde destacou que estes investimentos amosan o compromiso da Xunta coa provincia de Ourense e, máis en concreto, co seu rural para favorecer o desenvolvemento das súas infraestruturas e ás necesidades do tecido empresarial e industrial, converténdose en oportunidades xeradoras de postos de traballo.
Así mesmo, salientou o compromiso de Pontedeva coa xeración de riqueza e emprego, poñendo como exemplo a súa integración na iniciativa autonómica de Concellos Emprendedores para ofrecer unha menor fiscalidade, a concesión de licenzas industriais en prazos abreviados mantendo as mesmas garantías técnicas, lexislativas e medioambientais que se precisan, e outras vantaxes aos proxectos empresariais.
Pontedeva forma parte da lista de 65 Concellos Emprendedores de Ourense, a provincia galega máis representada neste ámbito, unha adhesión que lle permite ter prioridade no reparto de axudas autonómicas, como é este caso.