As obras de integración paisaxística do Camiño Francés en Santiago fan necesarios cambios no tráfico na tarde do venres e na mañá do sábado na zona dos Concheiros
Para realizar o asfaltado do carril descendente de Rodríguez de Viguri habilitaranse itinerarios alternativos, tanto de baixada como de subida, para o tráfico nesa contorna
Desde a rúa Monte dos Postes non se poderá acceder á rotonda da antiga estación de autobuses, aínda que si se poderá circular desde esa rotonda cara á citada rúa
Tamén quedará cortado o acceso desde a rúa Berlín cara ao nó de Concheiros, aínda que se poderá circular cara á rúa Viena e Pamplona
O avance nas obras de mellora e integración paisaxística do Camiño Francés á súa entrada en Compostela fan necesarios cambios no tráfico na tarde deste venres, día 11, e na mañá do sábado na zona do nó dos Concheiros.
O venres, a partir das 15,30 horas, e o sábado día 12 pola mañá, a partir das 08,00 h, está previsto asfaltar o carril descendente de Rodríguez de Viguri, o que obrigará ao seu corte ao tráfico, habilitándose itinerarios alternativos na contorna.
Así, os vehículos que circulen por Rodríguez de Viguri en sentido descendente desviarase antes da rotonda da antiga estación de autobuses polo carril que funciona actualmente en sentido ascendente (marxe par), para unha vez chegados a nó de Concheiros volver desviarse polo carril descendente (marxe impar) da avenida de Lugo.
O tráfico para os vehículos que circulen pola avenida de Lugo en sentido desviaranse na rotonda da Cruz Vermella de Fontiñas pola rúa Londres, para logo dirixirse cara a rúa Lisboa.
Desde a rúa Monte dous Postes quedará prohibido o acceso á rotonda da antiga estación de autobuses, aínda que si estará habilitada a entrada desde a rotonda á devandita rúa.
Tamén quedará cortado o acceso desde a rúa Berlín cara ao nó de Concheiros, aínda que se poderá circular cara a rúa Viena e Pamplona.
As obras, máis de 3M€
A Xunta continúa a avanzar nos traballos de mellora e integración paisaxística do Camiño Francés no ámbito da avenida de Lugo e do Cruce dos Concheiros, nos que está a investir máis de 3 millóns de euros.
O obxectivo da intervención é facer do nó dos Concheiros unha zona na que o Camiño sexa máis identificable para o peregrino, ademais de reforzar a seguridade viaria e mellorar os tráficos pensando no día a día dos veciños.
Trátase dunhas obras de remodelación complexas e de moita entidade, xa que abranguen tamén canalizacións, e unha das principais actuacións das previstas pola Xunta no marco da estratexia de mellora e integración paisaxística dos Camiños Francés, Inglés e Portugués á súa entrada en Compostela.
No seu conxunto, o proxecto integral de posta en valor das Rutas Xacobeas á súa entrada en Santiago supón un investimento do Goberno galego superior aos 10 millóns de euros. As actuacións previstas pola Xunta estarán rematadas na súa totalidade neste verán.