Galicia impulsa a actividade do Observatorio costeiro dedicado ao coidado do medio mariño

A conselleira do Mar, Rosa Quintana, e a conselleira de Medio Ambiente, Territorio e Vivenda, Ángeles Vázquez, asinaron hoxe un acordo entre ambos departamentos da Xunta para realizar actividades de apoio mutuo no ámbito da oceanografía operacional. Deste xeito o Executivo galego impulsa a actividade do Observatorio costeiro de Galicia, que desde hai máis dunha década ofrece de maneira integrada información océano-meteorolóxica da costa galega de grande utilidade para a investigación, a toma de decisións por parte das administracións e o desenvolvemento de servizos relacionados coa protección do medio ambiente costeiro.

O acordo asinado hoxe no Instituto Tecnolóxico para o Control do Medio Mariño (Intecmar) dá continuidade e fortalece a colaboración que veñen mantendo as consellerías do Mar, a través do Intecmar e do Cetmar, e de Medio Ambiente, a través de Meteogalicia, no desenvolvemento deste observatorio. Un labor, destacou a conselleira do Mar, que é froito do esforzo conxunto e que está dirixido a nutrir de información de calidade ao sector investigador vinculado ao medio costeiro, pois a oceanografía operacional require da toma de datos océano-meteorolóxicos e do desenvolvemento de modelos preditivos para a interpretación dos fenómenos mariños.

Grazas a este traballo, subliñou Rosa Quintana, Galicia conta cunha ampla rede de estacións de observación e predición das condicións océano-meteorolóxicas, que, entre outros aspectos, permite obter datos sobre a temperatura da auga, salinidade, meteoroloxía e correntes e información relativa a vento, temperatura e humidade. Esta información é de grande utilidade e apoio para o desenvolvemento do Plan territorial de continxencias por contaminación mariña accidental (Plan Camgal).

Isto, engadiu a titular de Mar, sitúa a fortaleza de Galicia no panorama nacional e internacional da oceanografía operacional e ao mesmo tempo permiten á nosa comunidade afrontar retos nos ámbitos científico e tecnolóxico para garantir a biodiversidade e protexer os ecosistemas.

A conselleira de Medio Ambiente salientou a importancia de establecer accións preventivas para garantir a biodiversidade e os ecosistemas mariños e costeiros, unha tarefa que -en Galicia- se volve imprescindible, pois nesta comunidade tamén son o motor dunha parte moi importante da economía, ademais de ser un distintivo.

Nese sentido, destacou que é preciso dispor de datos continuos e contar con modelo de predición que achegue información crucial para interpretar os posibles fenómenos mariños; polo que é tan necesaria a tecnoloxía como o persoal cualificado, dous aspectos que en Galicia se concentran nos departamentos que hoxe renovan esta colaboración.

Tal e como explicou a conselleira, esta rede de observación meteorolóxica e oceanográfica está formada por 157 estacións meteorolóxicas de superficie, é dicir, hai máis de 1.100 sensores de medición repartidos por toda a xeografía galega; catro equipos de detención de raios, un radar meteorolóxico, un equipo receptor de datos de Meteosat; e seis estacións océano-meteorolóxicas colocadas nas costas, que forman parte do Observatorio Costeiro, unha ferramenta tamén imprescindible para loitar contra o cambio climático.

O acordo

O acordo asinado hoxe implica, entre outras funcións, promover a participación do Observatorio costeiro en iniciativas de ámbito autonómico, nacional e internacional e fomentar a utilización da información xerada polo Observatorio costeiro nos protocolos de actuación do Plan Camgal. Tamén supón dar soporte con esta información a medidas de fortalecemento da resiliencia ante o cambio climático das áreas costeiras, á xestión dos recursos mariños e á implementación de acordos, tratados ou iniciativas lexislativas de ámbito nacional e europea.

A colaboración terá unha vixencia de catro anos desde a súa sinatura, con posibilidade de prórroga se así o deciden as partes. Ademais contará cunha comisión de planificación, seguimento, desenvolvemento e control con dous representantes da Consellería do Mar e outros dous da Consellería de Medio Ambiente, Territorio e Vivenda.