Meteogalicia reforza a súa rede de observación coa instalación dunha nova cámara web no concello de Monforte

MeteoGalicia continúa reforzando a súa rede de observación por toda a comunidade. Desde hoxe está operativa en Monforte de Lemos unha nova cámara web, de tal forma que o organismo meteorolóxico dependente da Xunta xa dispón dun total de 27 repartidas polas catro provincias, 8 delas na de Lugo.

Precisamente, a directora xeral de Calidade Ambiental, Sostibilidade e Cambio Climático, Sagrario Pérez, visitou esta mañá a localidade lucense para coñecer a nova instalación, emprazada nas inmediacións do Parador de Monforte por ofrecer unha vista xeral de todo o val, idónea para os obxectivos que se perseguen.

Estas cámaras web mostran información meteorolóxica do lugar como pode ser o estado do ceo, a temperatura ou o vento, polo que son un complemento moi útil aos datos das variables meteorolóxicas clásicas, xa que contribúen a mellorar a información subministrada á poboación a nivel local.

Así, tanto na páxina web como na aplicación de MeteoGalicia poden consultarse as imaxes obtidas por esta rede de visores web cada cinco minutos. Ademais, tamén está dispoñible unha animación do día en curso e da xornada anterior e inclúese un enlace coa vista que abrangue cada cámara.

Deste xeito, tal e como subliñou Sagrario Pérez, préstase un mellor servizo aos usuarios de Meteogalicia, que teñen a posibilidade de observar directamente o estado do ceo, a dirección do vento ou a situación do mar en tempo real.

Neste sentido, subliñou que a posta en funcionamento da nova cámara web de Monforte se enmarca dentro das actuacións da Consellería de Medio Ambiente, Territorio e Vivenda para ampliar a cobertura e mellorar as redes de observación ambiental de Galicia e actualizar os equipos de medición das mesmas, de xeito que incorporen os últimos avances científicos e técnicos en instrumentación e metodoloxía de medida para dispoñer de máis e mellor información sobre os ecosistemas galegos e a súa vulnerabilidade.

Con este fin, precisamente, no ano 2016 decidiuse incorporar a esta infraestrutura de observación unha rede propia de cámaras web que desde entón poden ser consultadas a través da páxina e da aplicación gratuíta para móbiles de MeteoGalicia.

A Consellería de Medio Ambiente, Territorio e Vivenda dispón dunha rede de observación meteorolóxica e oceanográfica integrada na actualidade por 157 estacións meteorolóxicas de superficie; un total de 6 boias oceanográficas e meteorolóxicas colocadas nos encoros e na costa galega; un sistema de detección de raios; un radar meteorolóxico; e un equipo receptor de datos do Meteosat.

Esta densa rede de observación permite prever a ocorrencia de adversos meteorolóxicos, así como realizar un exhaustivo seguimento das variables atmosféricas e oceanográficas, datos fundamentais para estudar e avaliar os impactos do cambio climático sobre a poboación, o territorio e os recursos naturais de Galicia.

A rede de observación actual compleméntase con modelos preditivos a varios días que permiten anticipar o comportamento atmosférico e oceanográfico. Todos os datos subministrados por esta infraestrutura publícanse na web de MeteoGalicia para garantir a súa accesibilidade.