Medio Ambiente abre a rolda de contactos cos comuneiros do Xurés para implicalos na redacción do Plan de xestión do parque

A Consellería de Medio Ambiente, Territorio e Vivenda retomou hoxe a rolda de contactos iniciada a comezos deste ano co obxectivo de darlle un pulo definitivo á redacción do Plan reitor de uso e xestión (PRUX) do Parque Natural da Baixa Limia-Serra do Xurés, un documento que marcará as pautas a seguir para orientar o desenvolvemento económico, turístico e medioambiental desta zona.

Con este obxectivo, a directora xeral de Patrimonio Natural, Belén do Campo, convocou en Ourense ás comunidades de montes de Lobeira, Muiños, Bande, Entrimo e Calvos de Randín —ás de cada concello por separado— para trasladarlles o contido e obxectivos do futuro plan e recadar a súa opinión ao respecto. As entidades pertencentes ao municipio de Lobios —que permanece pechado perimetralmente por mor da covid— foron as únicas que non puideron asistir á convocatoria por motivos sanitarios.

As reunións sucedéronse de forma bilateral ao longo de toda a mañá e prolongaranse ata ben entrada a tarde, co obxectivo de que a directora e mais o delegado territorial da Xunta en Ourense, Gabriel Alén, tiveran ocasión de revisar individualmente cos comuneiros de cada concello a proposta inicial de zonificación do PRUX. De igual xeito, os responsables autonómicos tamén recompilaron datos e información que manexan estas entidades sobre as peculiaridades de cada municipio, que serán de moita utilidade na elaboración do PRUX.

Cómpre lembrar que a Xunta se fixou como meta que 2021 sexa o ano do impulso definitivo ao Plan reitor de uso e xestión deste parque natural. Con este obxectivo e para garantir que o documento sexa froito do maior consenso posible con todos os actores implicados, a Consellería de Medio Ambiente, Territorio e Vivenda reuniuse en primeiro lugar cos alcaldes dos seis municipios ourensáns pertencentes ao Parque Natural do Xurés.

Os primeiros encontros cos rexedores producíronse a finais de xaneiro para analizar o resumo executivo do PRUX, a proposta de partida de zonificación do parque e os próximos pasos a seguir na tramitación, uns contactos que se repetiron a comezos de marzo.

As comunidades de propietarios de montes no Xurés son, por tanto, o segundo colectivo en ser chamado a consultas pola Xunta para a elaboración do documento, tendo en conta o peso e a relevancia que teñen estas entidades no parque natural máis extenso de Galicia.

Tras esta primeira reunión cos representantes das comunidades de montes da zona, a Consellería ten previsto concertar unha nova xuntanza coas entidades de Lobios, tan pronto como a situación sanitaria neste concello o aconselle e permita.

Así mesmo, tamén se manterán contactos con outros colectivos e sectores con intereses no Parque Natural do Xurés co fin de seguir reforzando o traballo técnico que servirá de base do futuro PRUX.

Cronograma previsto

En canto ao cronograma previsto unha vez estea pechado o borrador do plan, os seguintes pasos serían proceder á súa presentación aos principais colectivos afectados e interesados; publicación do anuncio de información pública; resposta, avaliación e posible incorporación das achegas recibidas; solicitude de informes aos organismos con competencias; presentación ante o Consello Galego de Medio Ambiente e Desenvolvemento Sostible (Cogamads); traslado á asesoría xurídica; e aprobación polo Consello da Xunta, para a súa publicación no DOG.