O Sergas consigue mellorar aínda máis os excelentes resultados de atención aos infartos grazas ás últimas medidas implantadas

O director xeral de Asistencia Sanitaria, Jorge Aboal, levou hoxe ao Parlamento os resultados obtidos no Rexistro galego de infarto agudo de miocardio (Regaliam). Uns datos que están estreitamente vinculados á implantación de Programa galego de atención ao infarto (Progaliam).

Desde a posta en marcha do Regaliam, en xuño de 2015, ata decembro de 2020, lévanse rexistrados un total de 6.430 Infartos agudos de miocardio (IAM) en Galicia. Desde esa data, a reperfusión mediante anxioplastia primaria mellorou de xeito global chegando ao 90% dos pacientes, mentras que descende o número de reperfundidos mediante fibrinolise (menor de 5%) e o de non reperfundidos, que caeron drasticamente, situándose en torno a un 2%.

Cando falamos de tempos de reperfusión, -segundo explicou Aboal-, temos que ter en conta dous compoñentes: o que depende dos pacientes, que comeza a computar dende o inicio dos síntomas ata o primeiro contacto sanitario; e o tempo dependente da atención polo sistema sanitario, que comprende dende o primeiro contacto sanitario ata a reperfusión da arteria. No tempo referido aos pacientes, o Regaliam deixa constancia de que as persoas con IAM non quedaron nas súas casas por medo á pandemia, e que sí contactaron cos sistemas sanitarios como calquera outro ano: A modo de exemplo, no ano 2015, esta media situase nunha hora e 13 min., e no ano da pandemia esta media foi dunha hora 14 min.

Respecto aos tempos dependentes da atención polo sistema sanitario (que comprende desde o diagnóstico ata a apertura da arteria responsable do infarto) acadouse o dato de 99 minutos de media na atención no ano 2020 baixo a presión asistencial que supuxo este ano a pandemia da covid. Cómpre destacar que o indicador de calidade da Sociedad Española de Cardioloxía marca ese tempo por debaixo dos 120 minutos.

Os indicadores de mortalidade a 30 días, unha vez excluídos os pacientes con parada cardiorespiratoria ou shock en Galicia foron do 2,59%, sendo o 5% o establecido pola Sociedade Española de Cardioloxía como un estándar de calidade da atención, que é o mellor dato global en Galicia dende a creación do Rexistro.

O Programa galego de atención ao infarto e o Rexistro galego de infarto agudo de miocardio

Tal e como destacou Jorge Aboal, o Programa galego de atención ao infarto foi un proxecto pioneiro en España que desenvolve unha rede para identificar e atender precozmente e con maior calidade aos pacientes que sufrían infarto agudo de miocardio, buscando reducir a mortalidade e morbilidade provocada por estea doenza. Procura un diagnóstico e tratamento precoz para mellorar a expectativa de calidade de vida do paciente con infarto así como promover a equidade no acceso ás prestacións do sistema sanitario.

Para recoller a información deste programa, monitorizar a calidade da atención ao infarto agudo de miocardio e propoñer os cambios necesarios que permitan unha mellora continua na asistencia dos pacientes, naceu o Rexistro galego de infarto agudo de miocardio.

Na súa intervención na Cámara, o director xeral do Sergas remarcou as actuacións realizadas nestes últimos anos para mellorar aínda máis a calidade na asistencia. Entre elas citou a creación de novas unidades de soporte vital avanzado en Foz, Monforte de Lemos e O Salnés; a ampliación a 24 horas dos horarios das salas de hemodinámica das áreas sanitarias de Lugo e Ourense; ou a modificación dos recursos asignados para o transporte do 061 e as derivacións dos pacientes para optimizar os recursos asistenciais.