A Xunta enxalza o papel decisivo das mulleres emprendedoras para revitalizar o rural nunha nova sesión de 'Xacobeo Peregrinas' en Xunqueira de Ambía

A secretaria xeral da Igualdade, Susana López Abella, e a directora de Turismo de Galicia, Nava Castro, participaron hoxe no III Encontro Xacobeo Peregrinas, na Colexiata de Xunqueira de Ambía, en Ourense. O acto contou coa participación no coloquio como invitadas da astrofísica da NASA, Begoña Vila; a zoqueira, Elena Ferro; a enóloga, Iria Otero; e a actriz e produtora, Nerea Barros.

A titular de Igualdade, López Abella, resaltou o importante rol do tecido asociativo para empoderar ás mulleres rurais, “para formalas e animalas a saír do seu entorno”. A secretaria xeral fixo especial fincapé no labor da Federación de Mulleres Rurais de Ourense (Femuro) que o pasado 8 de marzo recibiu a medalla Emilia Pardo Bazán polo seu traballo a prol da muller rural.

“Son necesarias as mulleres referentes tanto para a sociedade en xeral como para a mocidade en particular”, incidiu López Abella, quen lembrou os programas cos que a Xunta traballa nos centros escolares para que os estudantes recoñezan referentes nas súas contornas. Tamén fixo referencia a Sementes para Igualdade, que pon o foco nas emprendedoras do rural, das que destacou o seu “potencial e empoderamento ante a sociedade”.

A directora de Turismo de Galicia destacou, pola súa banda, o papel que desenvolve o Camiño de Santiago na vertebración do noso territorio, impulsando un desenvolvemento socioeconómico especialmente importante en áreas rurais que, doutro xeito, correrían o risco de esmorecer.

Neste sentido, destacou especialmente o peso da muller rural como emprendedora e como pedra angular de moitos proxectos que se foron asentando no territorio nos últimos anos permitindo darlle unha nova vida e oportunidades a estas áreas, “mulleres emprendedoras, valentes, que souberon ver as oportunidades que nos brindan os nosos recursos para artellar o seu proxecto de vida”. Exemplos precisamente que se recollen nestas conversas de Xacobeo Peregrinas nas que se aborda o Camiño desde outras perspectivas.

O de hoxe foi o terceiro encontro do ciclo Xacobeo Peregrinas, enmarcado na programación do Xacobeo 2021-2022, que se estreou o pasado 13 de marzo en Santiago e inclúe dez sesións, con periodicidade mensual, abertas ao público. Cada unha das accións está dedicada a unha ruta xacobea distinta, co obxecto de por en valor a singularidade do seu percorrido e as experiencias das peregrinas.

O programa pretende xerar espazos de reflexión que fomenten o intercambio de experiencias arredor da peregrinación e o Camiño de Santiago coa muller como protagonista. Para facelo, a Xunta conta en cada sesión con profesionais de distintas disciplinas e procedencias. Relatan a súa vinculación co Camiño de Santiago, contando en cada proposta un nexo de unión con el: un libro, unha historia, unha experiencia persoal...

A localidade ourensá de Xunqueira de Ambía foi o lugar elixido para este terceiro encontro pola súa relevancia histórica como punto de encontro do camiño da Vía da Prata, o de maior percorrido das rutas xacobeas, chegando a contar no século XVI cun hospital con capacidade para atender a cen peregrinos.