O director xeral de Gandaría, Agricultura e Industrias Agroalimentarias visitou hoxe as instalacións
A Xunta destina máis de 130.000 euros á implantación do centro comarcal de desenvolvemento rural A Fusquenlla en Moeche que se centrará na transformación agroalimentaria e na formación
En concreto, a Consellería do Medio Rural sufragou o proxecto de execución básico da rehabilitación dunha nave para facer realidade este Centro, así como parte das obras a través da medida Leader
Promovidas polos concellos de Moeche, San Sadurniño, Cerdido e Valdoviño, as instalacións funcionarán como recinto de transformación de excedentes agroalimentarios e como espazo formativo e de coworking
A idea é que A Fusquenlla se converta en referentes na impartición de cursos sectoriais, coa colaboración da Oficina Agraria Comarcal de Ferrol
A Xunta destinou máis de 130.000 euros á implantación do Centro comarcal de desenvolvemento rural A Fusquenlla en Moeche, que funcionará como recinto de transformación de excedentes agroalimentarios e como espazo formativo e de coworking integrado nunha rede de ámbito provincial. Así o destacou o director xeral de Gandaría, Agricultura e Industrias Agroalimentarias, José Balseiros, que hoxe visitou as instalacións acompañado dos alcaldes dos concellos de Moeche, Cerdido, San Sadurniño e Valdoviño, todos eles promotores da iniciativa.
En concreto, segundo apuntou o director xeral, a Consellería do Medio Rural financiou o proxecto de execución básico de rehabilitación da antiga nave dos queixos de San Ramón para facer realidade este centro comarcal, por un importe de 11.999 euros. Así mesmo, sufragou parte das obras a través da medida Leader, cunha axuda de 119.022 euros xestionada pola Axencia Galega de Desenvolvemento Rural (Agader) e tramitada pola Asociación Seitura 22, grupo de desenvolvemento rural (GDR) de referencia nas comarcas do Eume, Ferrolterra e Ortegal, así como nos municipios de Miño e Vilarmaior.
Punto de encontro para a formación e o traballo compartido, o obxectivo é que na Fusquenlla se poidan elaborar todo tipo de conservas -marmeladas, produtos de horta, etc.-, ademais de envasar mel e producir zumes. Así, a idea é que no Centro se atopen medios e asesoramento profesional para procesar excedentes agroalimentarios, de maneira que os produtores poidan aportar aos consumidores un maior valor engadido, con producións non só da máxima calidade senón tamén con todas as garantías de seguridade e trazabilidade.
Así mesmo, as instalacións buscan ser un referente na impartición de cursos sectoriais coa colaboración da Oficina Agraria Comarcal (OAC) de Ferrol, dependente da Consellaría do Medio Rural. Nesa liña cabe sinalar que xa está previsto un curso de Operador de transformación e comercialización de produtos hortofrutícolas e do mel, impartido pola propia OAC, neste Centro comarcal de desenvolvemento rural A Fusquenlla.
Imaxes relacionadas
