Preto de 31.000 persoas da provincia de Pontevedra xa descargaron o Bono Activa Comercio da Xunta de Galicia

O director xeral de Comercio e Consumo da Xunta de Galicia, Manuel Heredia, visitou esta tarde varios dos 63 establecementos adheridos á iniciativa do Bono Activa Comercio no concello de Marín, onde xa son máis dun millar os usuarios desta iniciativa. Polo que respecta á provincia de Pontevedra, ata o momento, un total de 30.952 persoas descargáronse o bono para mercar nalgúns dos 1645 locais que se uniron a este proxecto de dinamización do comercio de proximidade da Xunta de Galicia.

Durante o seu percorrido por algúns dos comercios marinenses adheridos a este proxecto
-Libraría Espazo Lector Nobel, Perruquería Ana Budiño, Deportes Xesta, Mercería Labores y Patchwork, Paíno & Maína, Expert Ogando, Five Sport, Mi Mamá Me Mima e Xoiería Muíños-, Manuel Heredia destacou a gran acollida que está a ter a campaña e recordou que aqueles comercios que estean interesados en adherirse poden facelo aínda ata o 31 de maio a través da web bonosactivacomercio.gal.

Así mesmo, os clientes que aínda non conten co seu bono poden rexistrarse na mesma web e descargar os vales descontos por valor de 30 euros a través dunha aplicación móbil. O importe de cada bono irase consumindo en función do valor da compra: as que sexan iguais ou superiores a 30 euros terán un desconto de 5 euros, mentres que ás compras iguais ou superiores a 50 euros lles corresponde un desconto de 10 euros.

Os Bonos Activa Comercio, postos en marcha desde a Vicepresidencia segunda e Consellería de Economía, Empresa e Innovación, a través da Dirección Xeral de Comercio e Consumo, en colaboración coa Federación Galega de Comercio, forman parte do Plan de medidas específicas de apoio ao comercio galego que conta con axudas para incentivar o consumo e apoiar a modernización do sector a través da dixitalización e o comercio en liña. Así, contan cun orzamento de 10M€ cos que se pretenden mobilizar 55 millóns no sector e chegar a 330.000 clientes en toda Galicia.