A Xunta mellora o acceso á Ponte Vella do Rato atendendo ás demandas dos veciños de Castelo
A obra, a piques de rematar, consistiu no arranxo dun afundimento moi pronunciado de varios metros na entrada da ponte, que dificultaba a entrada de vehículos á sede de Cruz Vermella e o paso dos peóns
O delegado de Lugo, Javier Arias, que visitou as obras, sinalou que se trata de actuacións pequenas que pola contra contribúen a mellorar a calidade de vida dos veciños deste barrio
A Xunta de Galicia, a través do servizo de Conservación da Axencia Galega de Infraestruturas, está a rematar a mellora do acceso á Ponte Vella do Rato, na Chanca, no cruce da estrada do Rato. Unha obra sinxela pero que dá resposta ás demandas da Asociación de Veciños Castelo-Rato-A Chanca, e que tamén facilita a entrada de vehículos á sede da Cruz Vermella que hai nesta zona.
Os traballos, que están a piques de rematar, consistiron no levantamento do adoquín, recheo con base de cemento para corrixir o afundimento de varios metros da ponte, e posterior colocación de pavimento. Deste xeito, corríxese un desnivel moi amplo que provocaba un gran charco de auga e que as veces dificultaba a entrada de vehículos e incluso o paso de peóns.
Así o explicou o delegado da Xunta en Lugo, Javier Arias, que insistiu na importancia destas obras que “pese a ser actuacións moi sinxelas contribúen a mellorar a calidade de vida dos veciños e veciñas desta zona da cidade”.
O presidente da Asociación de Castelo-Rato-A Chanca, Manuel Miranda, acompañou ao delegado da Xunta na visita a estes traballos, que dan resposta a unha solicitude que él mesmo realizou o pasado 20 de abril nunha reunión mantida con Javier Arias. Na súa visita á zona da Chanca, o presidente deste colectivo trasladou outras peticións ao delegado da Xunta para seguir avanzando na mellora deste barrio.
Imaxes relacionadas
