A Xunta inicia as obras de construción da nova senda entre Carballo e Coristanco cun investimento de máis de 1 M€

A Consellería de Infraestruturas e Mobilidade vén de iniciar a construción dunha nova senda entre Carballo e Coristanco, que suporá un investimento autonómico de máis de 1 millón de euros.

O contrato, adxudicado á empresa Construcciones López Cao, S.L, conta cun prazo de execución de 8 meses, polo que o seu remate se prevé para finais deste ano.

As obras, que se desenvolverán na marxe da estrada autonómica AC-552, consisten na execución dun novo itinerario de uso compartido, para peóns e ciclistas non deportivos.

O itinerario de preto de 2,5 km de lonxitude iniciarase á saída de Carballo e rematará no punto no que comezan as beirarrúas do municipio veciño de Coristanco. Prevense dous treitos actuando, tanto na marxe esquerda da estrada, como polo lado dereito.

Pola marxe esquerda, serán case 1,9 km de nova senda que irán desde a saída de Carballo ata conectar coa beirarrúa existente en Montecelo, xa en Coristanco, continuando a beirarrúa ata o núcleo de Coristanco.

Pola marxe dereita da estrada, habilitarase unha senda ata as inmediacións da fábrica de Calvo de aproximadamente 600 metros.

Co obxectivo de darlle continuidade ao itinerario sobre o río Grande, executarase unha pequena pasarela adosada ao viaduto existente.

O proxecto tamén prevé traballos de pavimentación, drenaxe de augas pluviais, xunto coa execución dalgúns servizos en previsión de futuras canalizacións de telecomunicacións e alumeado.

Esta intervención completa o Plan de Sendas da Xunta para a comarca de Bergantiños, dado que os outros 6 itinerarios previstos xa están executados.

En total, a Xunta impulsou a execución de 11 km de sendas seguras, sostibles e integradas na paisaxe cun investimento de preto de 5 millóns de euros. A execución destas actuacións está cofinanciada con fondos FEDER 2014/2020.