A Xunta moderniza os sistemas de climatización e ventilación do pavillón municipal de Cordeiro cun investimento de 40.000€ do Fondo de Compensación Ambiental

O delegado territorial da Xunta en Pontevedra, Luis López, e o alcalde de Valga, José María Bello, supervisan esta actuación, orientada a incrementar a eficiencia e sostenibilidade dos máis de 3.000 m2 do recinto

A obra complementou a ampliación de vestiarios e aseos acometida polo Concello e dá cobertura axeitada ao polideportivo e o ximnasio ante o aumento de usuarios

“Seguimos apostando pola constante mellora dos servizos públicos dos concellos e esta era necesaria para reforzar a confortabilidade do pavillón”, di Luis López

Valga, 23 de abril de 2021

A Vicepresidencia primeira da Xunta de Galicia vén de rematar as obras de modernización e renovación integral dos sistemas de climatización e ventilación do pavillón municipal de Beiro, emprazado na parroquia de Cordeiro do Concello de Valga, cun investimento de 40.000€ financiado ao abeiro da liña competitiva do Fondo de Compensación Ambiental (FCA).

Con motivo da conclusión dos traballos, o delegado territorial da Xunta en Pontevedra, Luis López, e o alcalde de Valga, José María Bello, achegáronse ata o recinto deportivo para supervisar esta actuación, orientada a incrementar a eficiencia e sostenibilidade dos máis de 3.000 m2 destas instalacións.

“Seguimos apostando pola constante mellora dos servizos públicos dos concellos, xa que elo repercurte positivamente na calidade de vida dos cidadáns, e esta actuación en Valga era máis que necesaria para reforzar a confortabilidade do pavillón e de todas as súas áreas, xa que cada vez está a ser máis utilizado polos veciños”, sinalou o representante autonómico.

O polideportivo municipal de Beiro conta cunha ampla zona de pistas deportivas e un ximnasio que rexistra un ascendente número de usuarios e ademais vén de incrementar e modernizar o seu espazo de vestiarios e aseos ata os 335 m2 cunha actuación realizada polo Concello de Valga.

Precisamente, a ampliación destas dependencias e a crecente presenza de deportistas motivou a necesidade de renovar a climatización e ventilación, que se acometeu coa instalación dunha bomba de calor aire-auga e de sistemas de recuperación de calor e renovación ambiental, así como das correspondentes canalizacións e caixas de aireación.

Ademais, durante a visita o delegado territorial e o rexedor de Valga tamén estiveron na zona de pistas do pavillón para analizar a posibilidade de mellora do solo a través da Xunta de Galicia. Luis López comprometeuse a xestionar esta actuación para ver se ten encaixe e existe dispoñibilidade orzamentaria para a súa execución.

Imaxes relacionadas