A Xunta restablece a totalidade dos servizos de transporte público dos sábados nas áreas da Coruña e de Ferrol ao detectar un incremento da demanda

A Xunta decidiu restablecer desde esta fin de semana a totalidade dos servizos de transporte público interurbano dos sábados nas áreas da Coruña e de Ferrol ao detectar un incremento da demanda.

O incremento da mobilidade rexistrada nestas zonas, unido á situación sanitaria, levou á Xunta a recuperar todas as expedicións nestas liñas, que se viron afectadas por unha adaptación temporal desde febreiro derivadas do descenso da mobilidade a consecuencia da pandemia da covid-19.

A evolución sostida da pandemia fai que se teña rexistrado nas últimas datas unha recuperación da demanda de transporte público nas contornas destas dúas áreas de transporte metropolitano.

Ante esta tendencia crecente, a Consellería de Infraestruturas e Mobilidade deu instrucións á empresa concesionaria, Alsa, de que proceda á restitución completa de dos servizos dos sábados que están recollidos nos contratos de concesión dos que é titular: leste da comarca da Coruña e metropolitano de Ferrol.

Esta medida beneficia a cidadanía dos concellos de Arteixo, da Coruña, da Laracha, de Bergondo, de Betanzos, de Cambre, de Carral, de Cerceda, de Culleredo, de Oleiros, de Ordes e de Sada; así como aos veciños de Ferrol, de Narón e de Neda.

A partir deste sábado, día 24 de abril, a veciñanza destes municipios volve ter dispoñibles todas as conexións e frecuencias recollidas nos contratos.

O seguimento continuo que vén facendo a Xunta das necesidades no transporte público, para garantir o dereito á mobilidade dos cidadáns de modo acorde á situación sanitaria, xa levara a recuperar en marzo servizos directos entre as cidades da Coruña e de Ferrol, conexións ás que agora se engade a restitución dos servizos os sábados nos dous contratos que opera Alsa.

Nesta liña de traballo, o Goberno galego mantén o compromiso de restablecer os servizos de transporte público en todos os casos que sexa necesario polo incremento da demanda.

Ademais, traballa coa previsión de restituír os servizos de transporte público interurbano en toda Galicia en próximas semanas, sempre e cando a situación sanitaria sexa favorable.