A Xunta inicia as obras de mellora do firme na avenida da Paz, no concello de Ribeira
A intervención conta cun investimento autonómico de máis de 48.000 euros e cun prazo de execución estimado de 2 meses
Os traballos realízanse no treito da estrada PO-309 que se corresponde coa avenida, entre os puntos quilométricos 0+050 e 1+550
Tamén se acometerán actuacións de conservación para poder acondicionar o pavimento de toda a súa lonxitude
A Consellería de Infraestruturas e Mobilidade continúa traballando na mellora da estradas autonómicas coa fin de reforzar a seguridade viaria e mellorar as prestacións aos usuarios
A Consellería de Infraestruturas e Mobilidade acaba de iniciar as obras de mellora do firme na avenida da Paz, no municipio de Ribeira.
A intervención foi adxudicada á empresa Construcciones J Mauri e hijos SL por un importe de máis de 48.000 euros, e está a levarse a cabo no treito da estrada autonómica PO-309 entre os puntos quilométricos 0+050 e 1+550, que se corresponden coa dita avenida.
Os traballos teñen un prazo de execución estimado de dous meses e consisten na rehabilitación do firme neste treito. A actuación completarase con accións de conservación da Xunta para poder acondicionar o pavimento de toda a súa lonxitude.
En concreto, fresaranse dúas cuñas triangulares na parte exterior de cada carril para dar encaixe a unha nova capa de rodadura.
Tamén se estenderá mestura bituminosa en quente como capa de rodadura sobre o firme existente.
A Xunta continúa traballando na mellora da estradas autonómicas coa fin de reforzar a seguridade viaria e mellorar as prestacións aos usuarios.
Imaxes relacionadas
