A Xunta convoca axudas por importe de 4 M€ destinadas aos concellos de menos de 5.000 habitantes para a execución de obras de abastecemento, saneamento e depuración
Os incentivos terán o límite máximo de 50.000€ por solicitude, podendo presentar cada concello dúas, unha para mellorar os servizos de abastecemento e outra para a modernización ou nova construción de instalacións de saneamento e depuración
Serán subvencionables os investimentos realizados desde o 1 de xaneiro deste ano nas distintas infraestruturas municipais
As entidades locais interesadas poden solicitar as axudas desde mañá e no prazo dun mes a través do formulario dispoñible na sede electrónica da Xunta: https://sede.xunta.gal
As axudas, compatibles con outras subvencións, inclúen tanto os investimentos realizados na execución das propias obras como os gastos asociados ás mesmas
A Consellería de Infraestruturas e Mobilidade, a través de Augas de Galicia, publica hoxe no Diario Oficial de Galicia a convocatoria de axudas por importe de 4 millóns de euros para que os concellos cunha poboación igual ou inferior a 5.000 habitantes poidan executar obras de abastecemento, saneamento e depuración.
Mediante esta convocatoria para o exercicio 2021, subvencionaranse os investimentos realizados desde o 1 de xaneiro na execución de obras necesarias para o funcionamento óptimo dos sistemas de abastecemento municipal; nas obras dirixidas á execución de actuacións de modernización e aumento da eficiencia e eficacia das instalacións de saneamento e depuración existentes; ou os destinados á construción de novas infraestruturas. No seguinte enlace ao DOG pode consultarse a resolución coas bases para a concesión de subvencións aos concellos: https://xurl.es/aogmg
O importe destas axudas terá un límite máximo de 50.000 euros por solicitude e cada concello poderá presentar dúas solicitudes, unha referida a actuacións en sistemas de abastecemento, e outra para actuacións en sistemas de saneamento e depuración.
As subvencións distribuirase en dous grupos, o 50% do importe destinarase a obras executadas en sistemas de abastecemento e outro 50% restante a obras executadas en sistemas de saneamento e depuración.
Os concellos interesados dispoñen dun mes de prazo para a presentación de solicitudes, contado a partir de mañá. Deberán presentar as ditas solicitudes a través do formulario dispoñible na sede electrónica da Xunta de Galicia: https://sede.xunta.gal
Estas subvencións, compatibles con outras axudas, inclúen tanto os investimentos realizados na execución das propias obras, como os gastos asociados a elas en materia de actividades preventivas e accións de coordinación empresarial, de control de calidade ou de dirección dos traballos.
Con esta liña de axudas o Goberno galego segue a traballar cos concellos apoiándoos na adopción de medidas que garantan o mellor funcionamento dos servizos da auga, de competencia municipal, que redundan na calidade de vida dos veciños e veciños dos municipios máis pequenos de Galicia.
Esta nova actuación da Xunta conta coa financiación do Eixo REACT-UE do Programa Operativo FEDER Galicia 2014-2020.
Imaxes relacionadas
