A Xunta inicia as obras de estabilización do muro do aparcadoiro do Hospital Materno Infantil da Coruña

A Consellería de Infraestruturas e Mobilidade iniciou hoxe as obras de estabilización e mellora do muro do aparcadoiro do Hospital Materno Infantil da Coruña.

As actuacións consistirán na reconstrución do muro que sufriu desprendementos como consecuencia do estado dunha tubaxe existente na zona e das fortes chuvias de decembro.

O obxectivo dos traballos que se van levar a cabo é reforzar a estabilidade desta infraestrutura coa fin de garantir a seguridade nesta contorna.

As obras, adxudicadas á empresa Construcciones Leonardo Miguelez, S.L. por máis 48.000 euros, teñen un prazo dun mes.

A reparación comezará coa retirada do material para a posterior execución do muro co correspondente recheo. A continuación, construirase o muro de coieira e reporanse os servizos afectados como o alumeado público, o abastecemento ou a xardinería.

Tamén se reporá o tramo de beirarrúa afectado, mediante a nova instalación de bordo prefabricado de formigón e pavimento de baldosa hidráulica. Ademais colocarase unha varanda de protección de peóns.

Cómpre lembrar que a Xunta executou o ano pasado obras de mellora do firme no acceso aos aparcadoiros do Hospital Materno Infantil e puxo en servizo nesta contorna 23 prazas de aparcadoiro. Estas actuacións forman parte dun contrato maior que recolle a mellora nos accesos noutros hospitais públicos da provincia, como os de Santiago, Ferrol, Cee e o Barbanza, cun orzamento global de 1 millón de euros.

O Goberno galego continúa traballando para favorecer a mobilidade na contorna dos centros hospitalarios, ofrecendo unha mobilidade máis cómoda e segura, tanto para os pacientes, como para o persoal sanitario que se achega cada día ás instalacións.