A Xunta adxudica o acondicionamento do edificio do servizo de mobilidade na Coruña por importe de máis de 434.000 euros
A Consellería de Infraestruturas e Mobilidade prevé o comezo das obras en primavera para telas rematadas este mesmo ano
O obxectivo é mellorar as condicións de traballo dos 30 empregados do Servizo provincial de Mobilidade, así como da atención aos cidadáns que acuden ás instalacións a realizar xestións
Os traballos incluirán a reparación da estrutura de formigón, o tratamento da fachada ou a mellora da instalación eléctrica
Realizaranse actuacións de illamento para solucionar os problemas de humidades que se veñen producindo por mor da condensación
Substituiranse todas as ventás do edifico e colocaranse 36 radiadores
Mellorarase a accesibilidade coa instalación dun ascensor e a disposición dunha nova porta de entrada que facilite o paso de persoas con mobilidade reducida
A Xunta vén de adxudicar as obras de acondicionamento do edificio do Servizo da Mobilidade na Coruña por importe de máis de 434.000 euros.
A intervención, adxudicada á empresa Proyecon Galicia S.A., conta cun prazo de execución de 6 meses e comezará esta primavera co obxectivo de tela rematada este mesmo ano.
O obxectivo da actuación é mellorar as condicións de traballo dos 30 empregados do Servizo provincial de Mobilidade, así como da atención aos cidadáns que acuden ás instalacións a realizar xestións.
Os traballos de acondicionamento do edificio do servizo de Mobilidade na Coruña incluirán a reparación da estrutura de formigón, o tratamento dos perfís de aceiro na fachada, a mellora da rede de pluviais e da instalación eléctrica.
Tamén se realizarán actuacións de illamento para solucionar os problemas de humidades que se veñen producindo por mor da condensación.
A intervención inclúe a substitución de todas as ventás do edificio, así como a colocación de 36 radiadores térmicos cerámicos.
Os falsos teitos que presenten carencias serán demolidos e substituídos por unhas estruturas novas de escaiola.
No que se refire á mellora da accesibilidade, transformarase o actual montacargas nun ascensor. Ademais, substituirase a porta da entrada por outra nova con follas asimétricas que facilite o paso de persoas con mobilidade reducida.
De xeito complementario, executaranse obras menores en materia de electricidade e fontanería nos aseos. Así, arranxaranse os sistemas de secado de mans ou os interruptores e reporanse billas, chaves de paso ou cisternas.
O proxecto prevé o pintado xeral do interior do edificio, especialmente nas zonas afectadas polas obras.