A Xunta pon en valor a aposta polo turismo sustentable do destino Mariñas Coruñesas Terras do Mandeo

A directora de Turismo de Galicia, Nava Castro, participou esta mañá no acto de entrega das distincións como Aloxamentos da Biosfera aos primeiros nove establecementos acreditados cos que conta o destino Mariñas Coruñesas e Terras do Mandeo, unha das seis Reservas da Biosfera de Galicia. Trátase dun recoñecemento a nivel nacional co obxectivo de impulsar o desenvolvemento dun modelo turístico de calidade dentro das Reservas da Biosfera.

No acto, no que tamén participaron o vicepresidente da Deputación da Coruña, Xosé Regueira, e o presidente da Reserva de Biosfera, José Antonio Santiso, Nava Castro puxo en valor o feito de que esta reserva galega sexa unha das pioneiras en acadar estas novas certificacións de calidade “avanzando de xeito moi notable no camiño da calidade e da excelencia da man da creación dun destino turístico baseado nunha conservación do territorio compatible co desenvolvemento do tecido económico e social”.

Neste sentido, Castro destacou que este recoñecemento vén de novo a amosar a posición de liderado que ocupa Galicia en materia de calidade turística e firme aposta da Xunta de Galicia por fomentar un modelo de turismo sustentable.

Aposta pola calidade

A directora de Turismo de Galicia destacou tamén o traballo realizado por este territorio, o primeiro destino de ecoturismo certificado en Galicia e tamén o primeiro en integrarse ao Club de Ecoturismo en España. Acreditado como Destino SICTED (Sistema de Calidade Turística do ICTE) desde 2019, o territorio conta actualmente con 53 empresas adheridas das case 900 integradas neste sistema de calidade en toda Galicia.

A Reserva da Biosfera Mariñas Coruñesas e Terras do Mandeo acreditaba o ano pasado os primeiros Restaurantes da Biosfera, dos que agora xa ten certificados 21 aos que agora se suman os 9 Aloxamentos da Biosfera e os certificados de calidade que acreditan outras empresas do destino vencellas coa gastronomía ou o turismo industrial.

Unha aposta pola calidade que, segundo destacou a directora de Turismo, “acredita o esforzo non só como destino senón tamén o traballo das empresas que asumen un compromiso ambiental, coa calidade, a sustentabilidade e a mellora continua das experiencias e servizos no destino”, contribuíndo á diferenciación da súa oferta turística.