A Xunta investirá o 33% da reforma integral do pavillón de Fontecarmoa de Vilagarcía de Arousa
O orzamento total da actuación roldará os 1,5 millóns de euros
O secretario xeral para o Deporte, José Ramón Lete Lasa, vén de anunciar nunha xuntanza telemática mantida co alcalde de Vilagarcía de Arousa, Alberto Varela, que a Xunta de Galicia achegará o 33% da reforma integral do pavillón número 1 de Fontecarmoa, mentres que o concello vilagarcián farase cargo dos 2/3 do presuposto. O orzamento total da actuación roldará os 1,5 millóns de euros.
As obras que se levarán a cabo no pavillón constarán dunha reforma integral do edificio e a construción dun novo pavillón aproveitando a estrutura do xa existente. Así, actuarase non só sobre os vestiarios e as instalacións eléctricas e de saneamento senón, e ante todo, sobre a cuberta e o illamento e tratamento de todo o peche perimetral e das instancias interiores. Ao tempo se adoptarán todas as medidas necesarias para acadar a eficiencia enerxética esixible na actualidade nos edificios públicos.
O pavillón número 1 é o centro de todo o complexo polideportivo de Fontecarmoa, no que hai dous pavillóns de deporte, un estadio de atletismo, dous campos de fútbol, varias pistas de tenis e unha piscina.
En total, dos 32.474.216 euros cos que conta a Secretaría Xeral para o Deporte en 2021 (un 28,5% máis que en 2020), 9,15 millóns serán destinados a obras de creación e reforma de infraestrutura deportiva, un 118% máis que en 2020 cando se destinou ao mesmo obxecto 4,2 millóns de euros.