Medio Ambiente triplica o importe de 2021 ás axudas para o fomento da protección animal, ata os 440.000 euros

A conselleira de Medio Ambiente, Territorio e Vivenda, Ángeles Vázquez, lembrou esta mañá que o departamento triplicou por tres o importe de 2021 dedicado ás axudas para o fomento das accións de protección animal. A convocatoria do actual exercicio sairá publicada por un importe global de 440.000 euros, fronte aos 125.000 euros dispostos no anterior exercicio.

Así o recordou durante unha visita ao Centro de recollida de animais do Concello de Vilagarcía, ubicado na parroquia de Bamio; unha das protectoras máis antigas de Galicia inscrita no Rexistro de entidades de protección animal desde 1998, que se dedica á recollida de animais en situación de abandono, desamparo ou maltrato. O delegado territorial da Xunta en Pontevedra, Luís López Diéguez, tamén asistiu á visita.

Ángeles Vázquez salientou que con estas axudas o Goberno galego quere apoiar o traballo das asociacións destas entidades, que se preocupan por darlle unha nova vida e unha segunda oportunidades aos animais de compañía.

Indicou que a Dirección Xeral de Patrimonio Natural está ultimando a tramitación administrativa interna que permita publicar no mes de marzo, no Diario Oficial de Galicia, a convocatoria das axudas para o ano 2021 e que recolle como novidade unha liña específica –dotada de 275.000 euros- para a compra de pensos para os animais que se atopan aloxados nun centros de acollida autorizado.

A conselleira de Medio Ambiente salientou que se apostou por esta liña de actuación, despois de que as consecuencias da Covid-19 –e o estado de alarma- agudizaran as dificultades ás que se enfrontan estes centros, pois durante a pandemia minguou a súa capacidade de xerar ingresos e provocou estadías máis prolongadas nas instalacións dos animais ingresados. Nese sentido, recordou que a Consellería tramitou con carácter de urxencia o subministro de alimentos cos que se garantiu a manutención de case 2.300 cans e gatos abandonados de 13 entidades.

A orde de axudas de 2021 tamén prevé 125.000 euros para o microchipado e esterilización dos animais aloxados nos centros de recollida e os das colonias felinas e 40.000 euros para a compra de equipamentos nos centros de recollida de animais abandonados e a realización de campañas de sensibilización por parte das asociacións protectoras.

A conselleira de Medio Ambiente argumentou que Galicia é unha das rexións europeas máis avanzadas en canto á normativa en materia de protección animal, grazas á Lei de protección e benestar dos animais de compañía, que entrou en vigor no ano 2018. Esta normativa baséase en dous piares fundamentais: non ao maltrato animal en calquera das súas manifestacións e o abandono cero, promocionando a adopción dos animais abandonados nos centros de recollida e sancionando con importantes multas o abandono dos mesmos.

Explicou que unha mostra da efectividade desta lei é o número de inscricións rexistradas no o Rexistro Galego de Identificación de Animais de Compañía (Regiac), que se incrementou nun 25%, ao pasar dos 496.651 animais rexistrados a finais do 2017 –antes da entrada en vigor da Lei- aos 652.735 actuais; é dicir, rexistráronse un total de 156.084 novas altas no Regiac en tres anos de vixencia da Lei.

Por último, engadiu que a Xunta seguirá a traballar para conseguir que Galicia sexa unha comunidade libre de abandonos e para potenciar a adopción dos animais abandonados, así como loitar contra os malos tratos físicos e psíquicos. Unha traballo que debe ir da man das entidades, como a de Vilagarcía, co fin de acadar obxectivos claves na protección e defensa destes animais, defendeu a conselleira.