A Xunta recibe 3 ofertas para executar o acondicionamento e rehabilitación da Ponte de Pedra sobre o río Grande en Baio, no concello de Zas, cun investimento de case 328.000 euros
Trátase de mellorar a seguridade viaria e a accesibilidade peonil na ponte de xeito que se facilite a mobilidade entre ambas as ribeiras do río
Os traballos, que terán un prazo de execución de catro meses, consistirán nunha ampliación da ponte para reordenar o tráfico rodado e peonil
A intervención tamén porá en valor a propia estrutura da ponte e adecuará o entorno, tanto as beirarrúas, as marxes do río como os treitos de acceso á ponte, mellorando a accesibilidade peonil
A Xunta vén de recibir 3 ofertas para executar as obras de acondicionamento e rehabilitación da ponte de pedra sobre o río Grande ao seu paso por Baio, no concello de Zas, cun investimento de case 328.000 euros.
Esta actuación acometerase na estrada AC-552, no treito entre o punto quilométrico 2+100 e o 3+000.
Trátase de mellorar a seguridade viaria e a accesibilidade peonil na ponte da estrada autonómica AC-552, de xeito que se facilite a mobilidade entre ambas as ribeiras do río Grande. Ademais, a intervención porá en valor a propia estrutura da ponte e a súa contorna, tanto as beirarrúas, as marxes do río como os treitos de acceso á ponte.
A obra, que conta coa resolución favorable da Comisión Provincial de Patrimonio, terá un prazo de execución de 4 meses.
Os traballos centraranse na ampliación da sección transversal da ponte mediante a execución dunha lousa de formigón armado, con voadizos en ambos os laterais.
Esta ampliación permite reordenar o tráfico rodado e peonil, xa que a nova sección transversal posibilitará albergar dous carrís de 3,00 metros de ancho, beiravías de 0,25 metros ou beirarrúas de 2,10 metros de anchura.
O proxecto inclúe a disposición de pavimentos diferenciados para a zona de vehículos e para as beirarrúas no tramo sobre a ponte fronte aos utilizados fóra da zona da citada infraestrutura.