Luisa Piñeiro recolle as solicitudes do concello de Vilanova para xestionar as sendas de Caleiro e Corón, a mellora dos colexios, o alumeado do polígono de Baión e a humanización do centro

A delegada territorial da Xunta de Galicia en Pontevedra, Luisa Piñeiro, mantivo este mediodía unha reunión co alcalde de Vilanova, Gonzalo Durán, na que recolleu as súas solicitudes para xestionar as sendas de Caleiro e Corón, a realización de diversas melloras nos colexios, a dotación do alumeado no polígono empresarial de Baión e a humanización da praza do centro urbano.

A representante autonómica explicoulles que o paseo de Corón, na estrada autonómica PO-549, xa está en fase de contratación e a senda de Caleiro, na vía PO-307, atópase un pouco máis retrasada na fase administrativa. Neste eido, o rexedor vilanovés, que acudiu acompañado do seu tenente de alcalde, Javier Tourís, tamén se interesou pola mellora do centro da vila a través do Plan Hurbe.

Por outra banda, na xuntanza tamén se abordou a posible realización dalgunhas melloras nos centros educativos públicos e a renovación do alumeado no polígono industrial de Baión. Estas cinco actuacións son consideradas prioritarias para o Concello e a delegada anunciou que vai xestionalas coas distintas consellerías e ver as posibilidades de execución tendo en conta os plans existentes e a dispoñibilidade orzamentaria do Goberno galego.

Durante o encontro, tamén se trataron as recentes concesións da Xunta de Galicia ao Concello de Vilanova, xa que vén de outorgarlle un Plan de Infraestruturas Rurais, dotado con case 50.000€, e ten reservada unha partida de medio millón de euros para saneamentos nos Orzamentos Autonómicos 2021.

Deste xeito, dáselle continuidade aos investimentos no municipio despois de que se destinaran uns 800.000€ á rehabilitación enerxética e funcional do CEIP Xulio Camba e case 700.000€ na posta en marcha de dous obradoiros de emprego.