A Xunta destina máis de 212.000 euros ás obras de reparación e conservación exterior de dous bloques de vivendas do poboado mineiro de Fontao, en Vila de Cruces

A Xunta de Galicia destinará máis de 212.000 euros á execución de obras de reparación e conservación exterior dos bloques 2 e 8 do poboado mineiro de Fontao, rehabilitado polo Instituto Galego da Vivenda e Solo, no Concello de Vila de Cruces.

A obra foi adxudicada polo IGVS á empresa Prace Servizos e Obras, S.A., por importe de 212.602,59 euros e un prazo de execución de 7 meses. A obra a realizar consistirá na reparación e conservación dos bloques 2 e 8, que están compostos por un total de 16 vivendas.

A intervención, partindo da premisa do respecto ao valor arquitectónico do conxunto, ten como principal obxectivo a mellora da eficiencia enerxética das vivendas e consiste basicamente na aplicación dun novo enfuscado e pintado sobre o sistema de illamento térmico exterior (SATE) existente nas fachadas, na substitución e restauración de parte das carpintarías exteriores e na reparación de humidades

O poboado mineiro de Fontao foi adquirido polo IGVS no ano 2.000, rehabilitando tanto os bloques de vivendas como cos inmobles antigamente dedicados a cine, igrexa e escolas.

Unha vez rehabilitados os bloques residenciais obtívose un total de 78 vivendas cualificadas como de promoción pública, das que 62 continúan a ser propiedade do IGVS, que as adxudica en réxime de alugueiro. As restantes foron adxudicadas en compravenda.