O Cegadi acolle un proxecto de terapia acuática para impulsar a autonomía de persoas con algunha patoloxía neurolóxica

O Centro Galego de Desenvolvemento Integral (Cegadi) de Santiago de Compostela acolle este mes de decembro nas súas instalacións un proxecto de terapia acuática dirixido a impulsar a autonomía de persoas con discapacidade. En concreto, trátase dun programa rehabilitador dirixido ás persoas con algunha patoloxía neurolóxica.

É a Confederación Galega de Persoas con Discapacidade (Cogami) a encargada de desenvolver esta actividade, que se puxo en marcha tras rematar as obras de mellora de accesibilidade levadas a cabo pola Xunta de Galicia na piscina. Deste xeito, 13 persoas realizan sesións rehabilitadoras no vaso do Cegadi e cun protocolo de seguridade acorde á situación actual.

Os participantes, con idades comprendidas entre os 5 e os 60 anos, proceden de distintos puntos da Comunidade como Ordes, A Estrada, Ames, Porto do Son, Lousame, Valga e Santiago de Compostela.

Os usuarios deste proxecto son axudados por profesionais de fisioterapia, terapia ocupacional e logopedia con formación en terapia acuática. Así mesmo, tamén se instrúe aos familiares dos participantes para que, unha vez rematado o proxecto, poidan continuar realizando exercicios rehabilitadores que lles axuden a facilitar a mobilidade, controlar o corpo, mellorar a adaptación ao medio ou a relaxar a musculatura.