O Sergas publica as convocatorias ampliando as prazas de OPE en diversas categorías de persoal facultativo
Amplíanse en máis do dobre, o número de prazas convocadas no concurso-oposición de acceso para persoal médico
A realización dos exercicios está prevista para o segundo semestre de 2021
O Servizo Galego de Saúde vén de publicar, no Diario Oficial de Galicia, a ampliación de prazas de diversas convocatorias da oferta pública de emprego. Estas convocatorias son resultado do acordo unánime coa Mesa Sectorial pola que se suman ás 490 prazas de persoal licenciado sanitario convocadas en decembro do pasado ano, 506 novas prazas derivadas da oferta de emprego público do ano 2020, recentemente aprobada polo Consello da Xunta. Deste xeito acádanse un total de 996 prazas para licenciados.
Así mesmo, increméntase a convocatoria de técnico en farmacia en 10 prazas máis, terapeuta ocupacional en 6 e a de pinche en 10 prazas máis.
Con esta publicación reábrese o prazo dun mes para inscrición coa presentación de solicitudes e, no seu caso, o cambio de quenda de participación dos aspirantes xa inscritos na convocatoria xa formalizada e que deste xeito se amplía.
Esta acumulación de prazas ao proceso selectivo xa convocado permitirá a incorporación dun maior número de profesionais fixos nun menor espazo de tempo. Isto redundará nunha maior estabilidade dos equipos de traballo, ao tempo que fará a participación no proceso selectivo máis atractiva para os aspirantes, ao ver incrementado o número de prazas e, por tanto, as súas expectativas, ademais de evitar a súa participación en dous procesos distintos nun espazo temporal moi próximo.
As bases, estrutura do proceso (concurso-oposición), temarios, exercicios, baremos, procedemento e prazos de acreditación de méritos serán os mesmos que os aprobados por Resolución da Dirección Xeral de Recursos Humanos do 13 de decembro de 2019, de convocatoria do proceso, que non se verá modificada en ningún aspecto, agás no incremento do número de prazas convocadas.
No segundo semestre de 2021, despois do verán, realizaranse os exercicios para cubrir estas 996 prazas de 42 categorías de persoal licenciado sanitario, das cales 892 corresponden a 39 especialidades de facultativo de área, 89 a médico de urxencias hospitalarias, 10 a médico asistencial do 061, e 5 a médico de admisión e documentación clínica.
Con relación aos procesos actualmente en tramitación, que suporán a incorporación dun total de 1.492 profesionais das categorías de médico de familia, odontólogo e pediatra de atención primaria, persoal especialista de enfermería, fisioterapeuta, técnico en coidados auxiliares de enfermería e persoal de servizos xerais, prevese a súa resolución definitiva no primeiro cuatrimestre do 2021.
Cronograma de próximas convocatorias
No mes de xaneiro próximo están previstas as convocatorias de concurso-oposición das categorías de telefonista así como de pinche e técnico de farmacia, estas últimas para o acceso a prazas reservadas a persoas que acrediten unha discapacidade intelectual.
Así mesmo, no primeiro trimestre do próximo ano, procederase á convocatoria das probas selectivas para o acceso ás categorías de calefactor, condutor, costureiro, electricista, fontaneiro, lavandeiro, mecánico, pasador de ferro, persoal informático e traballador social.
Calendario de exames
No ano 2021 está prevista a realización dos exercicios da fase de oposición para cubrir un total de 1.320 prazas correspondentes a 49 categorías, entre elas as xa mencionadas de facultativos especialistas.
Así mesmo, desenvolveranse os exercicios para cubrir 324 prazas de técnico sanitario das especialidades de farmacia, laboratorio de diagnóstico clínico, imaxe para o diagnóstico, hixiene bucodental, anatomía patolóxica e citoloxía e radioterapia.
O exames máis próximos terán lugar no primeiro trimestre do ano 2021, cos exercicios da fase de oposición para cubrir 9 prazas de persoal de servizos xerais, pola quenda de discapacidade intelectual.
Para a realización de tales probas nas máximas condicións de seguridade no actual contexto de crise sanitaria, estase a elaborar pola Dirección Xeral de Recursos Humanos un protocolo de actuación covid para os procesos selectivos do Sergas. Entre outras medidas contempla o acceso dos aspirantes ao lugar de realización das probas a través de código QR, a cumprimentación dos datos identificativos da folla de resposta por parte do propio aspirante, ou a posta a disposición deste, a través de Fides/expedient-e do certificado de asistencia ás probas selectivas. Todas estas medidas contribuirán a unha maior axilidade no desenvolvemento dos exercicios e a unha redución dos contactos sociais.