Fernández-Tapias pon en valor o compromiso da Xunta coas entidades sociais para a provisión de alimentos aos colectivos vulnerables

A delegada territorial da Xunta de Galicia en Vigo, Marta Fernández-Tapias, visitou hoxe as catro entidades de Vigo que resultaron beneficiarias do convenio asinado entre a Xunta e o Parlamento de Galicia para a concesión de subvencións en especie, ao igual que xa se fixo durante o estado de emerxencia.

Así, a representante autonómica desprazouse ata as Misioneiras do Silencio, Banco de Alimentos, Comedor de la Esperanza e Afan, onde puido comprobar a recepción dos alimentos mercados por Medio Rural ao abeiro da rede Mercaproximidade a produtores e industrias de transformación de Galicia adheridos a esta canle, e que foron cedidos aos colectivos máis necesitados a raíz da covid-19.

Unha colaboración que, sinalou a delegada, ten como finalidade continuar a cooperación coas entidades de iniciativa social que realizan actuacións dos servizos de cobertura de necesidades de alimentos, dotándoas de produtos agroganadeiros adquiridos directamente aos agricultores, gandeiros e pequenas industrias galegas. Desta forma, séguese tamén a apoiar o traballo do sector primario galego que tamén sufriu as consecuencias da pandemia.

Para a compra de alimentos, dispúxose dun orzamento total de 130.000 euros, aportado a partes iguais entre a Xunta e o Parlamento.

Entre os produtos agroalimentarios que se repartiron figuran queixos, mel, carne de Ternera Gallega, de porco celta ou de cordeiro e patacas. Produtos de primeira necesidade que, recordou Fernández-Tapias, supoñen unha axuda para que estas entidades poidan responder á crecente demanda derivada da crise sanitaria.

Tamén, dixo, para a rede alternativa Mercaproximidade, creada pola Consellería do Medio Rural durante o estado de alarma para dar saída aos produtos agroalimentarios galegos que viron reducidas as súas vendas debido á covid-19.

Menús de Nadal

A esta iniciativa súmase o acordo de colaboración para facilitar menús solidarios de Nadal a persoas vulnerables. Segundo informou Fernández-Tapias, cociñeiras e cociñeiros galegos de prestixio encargaranse de elaborar, nas instalacións do Centro Superior de Hostalería de Galicia, unha serie de menús a base de produtos agroalimentarios procedentes da canle Mercaproximidade.

Estes menús, fornecidos con eses produtos de proximidade, adquiridos directamente a agricultores, gandeiros ou industrias de transformación de Galicia, distribuiranse despois mediante diferentes entidades solidarias das catro provincias en comedores sociais ou cociñas económicas para servirse o día de Noiteboa.

Se da así resposta, en palabras da delegada, á demanda das propias entidades sociais que poñen agora o acento na celebración do Nadal, e na necesidade de realizar actuacións concretas que permitan que as familias e as persoas en situación de vulnerabilidade poidan tamén celebrar estas festas.
Esta iniciativa solidaria conta cun orzamento total de 65.000 euros, que serán financiados pola Vicepresidencia primeira, a Consellería do Medio Rural e o Parlamento de Galicia.