A Xunta remata a rehabilitación da casa do legoeiro do Outo do Cumial e pon en valor esta contorna da Vía da Prata, ao carón da estrada autonómica OU-105, no concello de Ourense

A Consellería de Infraestruturas e Mobilidade rematou as obras de rehabilitación da casa do legoeiro do Outo do Cumial e de posta en valor da contorna da Vía da Prata, ao carón da estrada autonómica OU-105, no municipio de Ourense.

Esta intervención supuxo un investimento autonómico de preto de 48.000 e permitiu a mellora e integración paisaxística na contorna do Camiño de Santiago. Os traballos foron validados pola Dirección Xeral de Patrimonio Cultural e véñense sumar a outras melloras realizadas polo departamento de Infraestruturas da Xunta: como a mellora da seguridade viaria na propia OU-105, en Seixalbo, que tamén incidiu na mellora da Vía da Prata.

A casa do legoeiro
A casa do legoeiro utilízase na actualidade como edificación de servizo para os labores de conservación de estradas do departamento de Infraestruturas da Xunta e nos últimos anos realizáronse melloras interiores para mellor organización do servizo.

Con esta actuación mantense a configuración orixinal dos edificios da casa do legoeiro, dos anos 50 e libéranse as vistas do cruceiro, para o que se procedeu ao derrubamento das construcións anexas. Isto permitiu, ademais, habilitar unha pequena área de descanso para peregrinos a carón do cruceiro.

Os traballos incluíron o derribo das edificacións anexas e a retirada dos elementos da cuberta da casa do legoeiro, para a súa reparación e consolidación. Os cerramentos exteriores mantéñense e executáronse co mantemento das fachadas de cantería e fabrica existente.

Ademais, na contorna, a Xunta realizou melloras no paso dos peregrinos no Cumial, de modo que sexan encamiñados ao punto máis seguro de cruce da estrada.