O investimento da Xunta en universidades no 2021 reforzarase cunha partida adicional de 10 M€ para innovación e dixitalización

O conselleiro de Cultura, Educación e Universidade, Román Rodríguez, presidiu hoxe –por videoconferencia– a primeira reunión do Consello Galego de Universidades (CGU), onde destacou o esforzo dos Orzamentos 2021 en materia universitaria. Neste sentido, explicou que as contas do vindeiro ano inclúen unha partida adicional de fondos propios dotada con 10M€ para a dixitalización e innovación do Sistema Universitario de Galicia (SUG). “Trátase duns recursos adicionais ao xa orzamentado no plan de financiamento para o 2021 e que teñen como obxectivo contribuír á adecuación das universidades galegas aos novos tempos”, dixo.

Cómpre lembrar que, a través dos Orzamentos 2021, o SUG disporá de 451M€, unha cifra récord neste ámbito, que inclúe o devandito plan de dixitalización, así como un incremento do 6,2% (ata 67,8M€) das partidas dedicadas ao fomento da I+D+i e a programas de retención e atracción de talento consolidado.

O CGU fixo, ademais, balance positivo da baixa incidencia da covid-19 no ámbito universitario. Neste sentido, o titular do departamento educativo da Xunta de Galicia puxo en valor o esforzo de coordinación realizado entre as tres universidades e o Goberno galego desde o momento da suspensión das clases para o desenvolvemento do fin do curso pasado e para a preparación do 2020/2021.

Así mesmo, reiterou o compromiso da Xunta co labor desenvolvido desde as universidades, e que se materializa na transferencia de 13,9M€ en fondos adicionais para facer fronte ao sobrecuste que se derivan da adaptación do Sistema Universitario de Galicia (SUG) ao contexto da pandemia.

Verificación, reverificación e modificación

O pleno do CGU foi tamén informado das titulacións que a Secretaría Xeral de Universidades informou favorablemente para o seu envío a verificación, reverificación ou modificación á Axencia para a Calidade do Sistema Universidade de Galicia (ACSUG). Neste sentido, explicouse que, dado o contexto da covid-19, a Consellería ampliou este ano o prazo para que as universidades presentasen as súas propostas.

As titulacións que foron informadas favorablemente para o seu envío a verificación son as recollidas na seguinte táboa:

Revogación

Por outra banda, o CGU informou favorablemente a revogación de autorización de implantación do Máster en Xestión e Tecnoloxía de Estruturas e Instalación (UVigo) e a reverificación doutras cinco titulacións, previo acordo das propias universidades. Trátase dos graos en Arquitectura Técnica (UDC) e en Bioloxía (USC), dos máster en Arqueoloxía e Ciencias da Antigüidade (USC/UVigo), e en Planificación e Xestión do Desenvolvemento Territorial (USC) e do Programa de Doutoramento en Ciencias da Visión (UVigo, en conxunto con universidades de fóra de Galicia).