A Xunta publica no Diario Oficial de Galicia o cambio de titularidade a prol do Concello de Culleredo do treito inicial da estrada AC-213, entre O Burgo e Os Campós
Trátase do treito duns 1,8 quilómetros de lonxitude que discorre integramente polo termo municipal e no que a Xunta vén de investir 350.000 euros na mellora do firme
O Concello terá competencia para actuar nesta vía e asumirá a responsabilidade da súa conservación e mantemento
O cambio de titularidade será efectivo desde mañá
O Diario Oficial de Galicia publica hoxe o decreto do cambio de titularidade, a prol do Concello de Culleredo, do treito da estrada autonómica AC-213, entre O Burgo e Os Campós. No seguinte enlace ao DOG pode consultarse a información: https://xurl.es/s7mqs
O Concello solicitou ao departamento de Infraestruturas da Xunta a transferencia da titularidade do treito inicial desta estrada, desde o punto quilométrico 0 ao 1+840.
A Consellería de Infraestruturas e Mobilidade, de acordo cos informes emitidos polos servizos da Xunta na Coruña, formulou a proposta favorable de transferencia deste treito que descorre na súa totalidade polo termo municipal e que vén de ser obxecto da renovación recente do firme por parte da Xunta, cun investimento de 350.000 euros.
A transferencia a prol do Concello de Culleredo tramítase de acordo co previsto na Lei 8/2013, do 28 de xuño, de estradas de Galicia, que estable a súa aprobación por decreto da Xunta, a proposta da Consellería competente en materia de estradas, e logo do acordo entre as administracións implicadas.
Co cambio de titularidade, aprobado no Consello da Xunta do pasado día 26 de novembro, o Concello terá a competencia para actuar nesta vía e asume a responsabilidade da súa conservación e mantemento.
Este cambio de titularidade será efectivo desde mañá.