Ethel Vázquez trasládalle á alcaldesa de Forcarei que antes do vindeiro verán os menores de 21 anos do municipio poderán viaxar gratis no autobús interurbano coa tarxeta Xente Nova

A conselleira de Infraestruturas e Mobilidade, Ethel Vázquez, mantivo hoxe unha reunión coa alcaldesa de Forcarei, Verónica Pichel, á que lle trasladou que antes do vindeiro verán, os menores de 21 anos deste concello poderán viaxar gratis no autobús interurbano da Xunta coa tarxeta Xente Nova.

Vázquez Mourelle explicoulle á rexedora que os veciños de Forcarei tamén poderán utilizar en 2021 a tarxeta TMG, coa que accederán a importantes bonificacións nas tarifas. Precisoulle que os usuarios deste dispositivo se poden beneficiar de descontos do 10% sobre o prezo do billete.

Estes incentivos enmárcanse nos novos contratos do Plan de Transporte Público de Galicia, que supón a reordenación de todas as liñas de autobús dependentes da Administración autonómica, que estará culminada a finais de ano.

A conselleira tamén lle comunicou á alcaldesa que o vindeiro ano os concellos se poderán adherir á Área de Transporte de Galicia, que suporá o reforzo das bonificacións, seguindo o esquema das actuais Áreas de Transporte Metropolitano.

Neste caso, os viaxeiros que efectúen no mes un determinado número de desprazamentos, cos mesmos termos municipais de orixe e destino, tamén sumarán unha bonificación por recorrencia ou por ser membros de familias numerosas.