Medio Ambiente investirá o próximo ano 1,5 M€ na ampliación do polígono de Lalín co obxectivo de duplicar a súa superficie actual

A Xunta continúa dando pasos para executar a nova ampliación do polígono empresarial Lalín 2000, que desde hai anos actúa como motor económico e comercial da comarca do Deza. Os orzamentos da Consellería de Medio Ambiente, Territorio e Vivenda para o vindeiro ano inclúen unha partida de 1,5 millóns para avanzar na execución da cuarta fase do parque co obxectivo de poñer a disposición do tecido empresarial interesado 316.960 metros cadrados máis de solo.

Unha vez estea lista esta nova ampliación, tal e como subliñou esta mañá a conselleira Ángeles Vázquez no transcurso dunha visita á zona acompañada polo alcalde José Crespo, o polígono Lalín 2000 contará cunha superficie de máis de 680.000 m2, practicamente o dobre da que ten na actualidade.

Así, explicou que nas tres fases xa executadas tan só quedan dúas parcelas dispoñibles e unha delas está reservada para equipamentos sociais. Sen embargo, segue existindo interese entre o tecido empresarial da zona por asentarse neste polígono, o que xustifica, dixo, o compromiso adquirido polo seu departamento coa nova ampliación.

Tras lembrar que en total a Xunta prevé investir 15 millóns de euros no desenvolvemento desta cuarta fase, Vázquez Mejuto explicou que o ano que vén será clave para o futuro do proxecto. Así, despois de que Xestur adxudicara a mediados do pasado outubro a modificación do Plan de Sectorización e a redacción do proxecto de urbanización –por 111.450 euros- o seguinte paso será o inicio da tramitación ambiental do devandito plan, previsiblemente, antes de que remate 2020.

A continuación, poderase avanzar xa na adquisición dos terreos necesarios para levar a cabo a cuarta fase. Neste sentido, cómpre lembrar que aproximadamente a metade dos 316.960 m2 dos que consta a ampliación xa son propiedade da Xunta de Galicia polo que só restan por adquirir o 50% restante. Deste xeito, a previsión é que dentro dun ano se poidan licitar as obras de urbanización, paso previo á implantación das primeiras empresas.

Investimentos en solo industrial na provincia

Ademais dos 1,5 millóns de euros reservados en 2021 para a ampliación do polígono Lalín 2000, as contas da Consellería para o vindeiro exercicio tamén inclúen 2 millóns de euros para a Plataforma Loxístico Empresarial de Salvaterra-As Neves (Plisan) co obxectivo de lanzar un novo procedemento de venda de solo ante o interese existente entre as empresas.

En xeral e co fin de facilitar e incentivar a implantación e o crecemento das empresas na Comunidade galega, Ángeles Vázquez indicou que en 2021 a Consellería de Medio Ambiente dedicará unha partida de 37,3 millóns de euros a desenvolver iniciativas e políticas relacionadas con esta materia.

En concreto, subliñou os oito millóns de euros que se destinarán a prolongar as bonificacións –de entre un 30% e un 50%- para a adquisición do solo empresarial dispoñible nos parques xestionados polo IGVS e Xestur. Neste sentido, a conselleira lembrou que esta medida foi impulsada pola Xunta por primeira vez no ano 2015 con moi bos resultados e o seu mantemento cobra unha especial importancia no contexto actual, debido á necesidade de “traballar na reactivación económica de Galicia” e favorecer a actividade das empresas.