O Diario Oficial de Galicia publica a lista definitiva de adxudicatarios de prazas no concurso de traslados aberto e permanente do ano 2020

O Diario Oficial de Galicia (DOG) publica na súa edición de hoxe a Resolución pola que se resolve con carácter definitivo, o ciclo de adxudicación correspondente ao ano 2020 do concurso de traslados aberto e permanente para a provisión de prazas básicas de persoal estatutario sanitario e de xestión e servizos.

Este é o terceiro ciclo deste proceso de concurso aberto e permanente, posto en marcha a finais do ano 2017, que fai máis accesible o dereito á mobilidade do persoal estatutario fixo e en consecuencia a conciliación da vida laboral e familiar dos profesionais, posibilitando o cambio de destino cunha periodicidade mínima anual.

Do total de adxudicacións de destino, 723 profesionais fican na mesma área sanitaria na que están a traballar actualmente e outros 242 cambian de a unha área diferente. Este concurso voluntario implica cambios nos centros de saúde, xa que o persoal sanitario moverase a quendas e centros mais acordes coas súas expectativas laborais e tamén persoais.

Por mor deste proceso facilítase o cambio de centro de traballo a 73 médicos de familia, 324 profesionais de enfermería, 82 PSX (Persoal de servizos xerais) e 38 TCAE (Técnicos en coidados auxiliares de enfermería).

Recupéranse ademais 71 efectivos que estaban a prestar servizos noutras comunidades autónomas.

No cadro adxunto pódense consultar o número de profesionais adxudicatarios que obteñen un novo destino definitivo, desagregado por categorías:

As listas coas puntuacións e, de ser o caso, os destinos definitivos asignados a cada unha das categorías, atópanse publicadas, a disposición das persoas interesadas, na páxina web do Servizo Galego de Saúde. O estado de cada solicitude pode ser consultado polo/a concursante no seu expediente electrónico persoal en Fides/expedient-e/sección de procesos.

A evolución da situación epidemiolóxica, obrigou a adoptar neste proceso unha serie de medidas excepcionais para a súa execución. Estas medidas foron acordadas na Mesa sectorial de negociación do persoal estatutario polos representantes da Administración sanitaria e a totalidade das organizacións sindicais representadas na mesma (CIG, CCOO, CSIF, SATSE e UGT). Entre estas medidas, cómpre destacar que as xerencias dos centros sanitarios poderán diferir o cesamento daqueles profesionais que estean prestando servizos en unidades directamente relacionadas coa atención covid. Así mesmo suspéndense os prazos de toma de posesión e contémplase a posibilidade de regreso do profesional ao destino de orixe para a prestación de servizos neste con carácter transitorio, cando razóns imperativas da organización sanitaria así o demanden.

Malia o contexto sanitario actual e as particularidades anteriormente expostas na súa execución, o Servizo Galego de Saúde está a cumprir, sen excepción, o seu compromiso de resolucións anuais de concurso de traslados, consciente da importancia que para os profesionais teñen as medidas que favorezan a conciliación da súa vida laboral e familiar.

Está previsto que os adxudicatarios de novos destinos comecen a tomar posesión a partir do venres 27 de novembro.