A Casa da Cultura de Xinzo de Limia renova a súa cuberta ao abeiro das subvencións para a mellora de equipamentos da Xunta

O secretario xeral de Cultura, Anxo M. Lorenzo, visitou esta tarde a Casa da Cultura de Xinzo de Limia, cuxa cuberta está a ser renovada ao abeiro das subvencións para 2020 destinadas á mellora e equipamento das instalacións e locais de concellos destinados a actividades de carácter cultural da Xunta de Galicia. Este ano benefícianse destas axudas un total de 39 proxectos de mellora en instalacións culturais doutros tantos concellos das catro provincias galegas.

A Consellería de Cultura, Educación e Universidade destina a estas axudas 500.000€, dos que ao Concello de Xinzo lle corresponderon máis de 23.600 euros para sufragar esta obra Cómpre lembrar que a axuda máxima por entidade local beneficiaria ascende a 30.000€ (35.000€ cando se trate de solicitudes realizadas por agrupacións de concellos), e que o importe da subvención non pode exceder o 90% do orzamento total da actuación.

O secretario xeral de Cultura destacou que esta liña de subvencións é fundamental para a dinamización da cultura nas instalacións municipais, o que contribúe a ampliar a oferta dirixida e que os galegos poidan gozar de programación cultural sen saír da súa localidade. Estas axudas reafirman, así mesmo, o apoio do Goberno autonómico ás entidades locais comprometidas coa acción cultural para que poidan executar as súas programacións, así como contar coas oportunas infraestruturas que lles permitan a adecuada realización das actividades culturais que promovan, garantindo o servizo público que prestan á cidadanía.

Con estas subvencións as entidades locais poden acometer actuacións relativas ao equipamento e moblaxe de locais, a realización de obras de reforma, ampliación, modernización ou mellora de inmobles, así como a adquisición de materiais técnicos vinculados ao desenvolvemento das accións culturais. A percepción destas axudas é, en calquera caso, compatible con outras subvencións para a mesma finalidade procedentes de calquera outra Administración.

A maiores, visitou o mural do proxecto beneficiario do Fondo de Proxectos Culturais Xacobeo 2021, Entroido de Xinzo, un sentimento de Roberto Fernández Otero, situado na avenida de Ourense.