Trenor agradeceu ao grupo Vegalsa-Eroski o seu apoio aos produtos agroalimentarios galegos a través da rede da Xunta Mercaproximidade

O delegado da Xunta na Coruña, Gonzalo Trenor, recibiu esta mañá á directora de relacións institucionais do grupo Vegalsa-Eroski, Grabiela González e ao director de expansión e franquicias, Pedro Suárez. Trenor agradeceu o apoio que vén mostrando esta cadea de distribución cos produtos galegos do agro e do mar e, por ende, cos produtores do sector primario de Galicia.

O delegado da Xunta subliñou que a canle Mercaproximidade serviu precisamente para botarlle unha man a este eido produtivo e, de paso, facilitarlle tamén aos propios consumidores a compra de produtos de gran calidade. Neste senso, lembrou que o grupo Vegalsa-Eroski se adheriu a esta iniciativa, xunto con outras nove cadeas de distribución, e que permitiu dar saída aos produtos de pequenos agricultores e gandeiros que tiñan pechadas as súas canles habituais de venda, como foi a canle Horeca e os mercados ao aire libre, que pouco a pouco retoman a súa actividade.

Pola súa parte, destacou o importante papel das cadeas de distribución como Vegalsa-Eroski dentro da campaña ‘Merca produto fresco do mar. Estamos no mesmo barco’, desenvolvida polo Executivo autonómico para promocionar o consumo dos produtos do mar e recoñecer o importante labor realizado polo sector extractivo desde que comezou a alerta sanitaria para ofrecer produtos de calidade á sociedade. Nesta liña fixo fincapé na importancia de permanecer xuntos no mesmo barco para impulsar a demanda e os prezos dos produtos pesqueiros e para que a frota poida desenvolver a súa actividade en condicións de rendibilidade a pesar das dificultades derivadas da alerta sanitaria pola covid-19.